U Foreign Secretary ka ri India, u Vikram Misri ynne da pyntip u wa ka Pakistan da pteiñ ko wow siat cha ki chnong ki bru wa em ha Jammu & Kashmir wa Punjab heiwa ynne i step da pynjoor yei sait ya ka chnong Rajouri, J&K hadooh wa yap u Additional District Development Commissioner, u Raj Kumar Thapa uwa da man kam sa uwi u bru paidbah wa da yap heini wa siat ka Pakistan.
Ynne i step synyaaw hawa siat ka Pakistan, da ngat leh i yung u Thapa wei da khlaad u pyn ha ini i thaw wa jia.
Da pyntip leh wa em uwi u bru ha Ferozpur uwa da mynsoo nei pynhaap Bomb u Drone deilang wa kiwa ha-yung ha-sem u heiwa da wan wow e yarap ya ki da ki chipai.
Da beiñ u leh yei pteiñ ka Pakistan wow pynpoor ya ki khubor thok deiwa ong wa ka India siat Missile ko cha Amritsar wa chadooh cha Afghanistan.
U Misri da pynkynmoo u leh ya ka Afghanistan kayi ka ri wa jooh siat ya ka deiwa mang leh ya ki chnong ki bru.
Heiyatoh won wa iwa ong uwa e ktien ki chipai ka Pakistan wa kiwa chong chnong ka India leh da beiñ ki pyn ya ka India, u Foreign Secretary da jubab u deiwa ong wa ka India toh kawa dei synchaar paidbah wei ki bru man ki kiwa laitlooid iwa ka Pakistan ym sñiawthooh ko ya kam itæ.
Discussion about this post