Hadien san bnai wa wai mooyurim ka sorkar jylla yow sdang kreh thymme biang ya ka Iawmusiang Market Complex kawa da sahteiñ da ki phaw snem, deiwa mang hei lut wa Rs. 25 klur tam, ynne ka sngi won neiliang u MLA ka Jowai, u Wailadmiki Shylla ha chirup ki sahep ka chnat PWD wa u Contractor da lai li booddien u yei pynkreh deiwa hiar ha kani ka thaw yow sakhi dei khmat.
Hadien wa dep pait dep sylli, da kmen u wow yoo wa ka kaam da lai ko chait chait, wei dang hapoh 4-5 bnai donhi wa wai mooyurim leh la kamwa hadooh 25% i kreh da man iwa lai bait.
Ong u wa dap u dei kmen yow ye u pyndep noh ya kani ka yaaw kawa man i angnood ym du kiwa chong chnong ka Jowai tangwa yong ka Ri-loom Jaiñtia hi waroh kawi.
Hawa kylli la em hi mo i pynkylla ha kani ka mang wa thymme, ong u em hi i bynta ka mala yong kani ka Building iwa da mut nachwa da ka Tin tangwa neidaw wa yoo katni saja u syndong ya ki wei da pynkylla noh na ka Tin deiwa dung slab.
Katwa kiwi ki ar won tæ malu mala hi-eh em i pynkylla katwa yah i por kamjooh leh deiwa kyrpaad ka JHADC.
Kamwa yoo u wa i kreh man iwa smat bha yooluti u wa hanla booh ar snem leh, jan u Contractor wa pynkreh uwa em leh i bor ye u kreh smat ya iwon iwon i kaam, kamtæ hapoh ar snem yooluti u wow dep hi u ka.
Discussion about this post