Ynnin ka sngi neiliang ka seiñ Jaiñtia Students’ Movement (JSM) da lai yachem ko sa ya u Director of School Education and Literacy ha ka yung krehkaam u wa em ha Shillong.
Kam wow pynkynmoo wa ka JSM da booh ko ya ki chithi cha ka DSEO, WJH kamjooh cha u DC, WJH nadooh ka 5 tarik uni u bnai, kamtæ da booddien chi booddien khlem da chong-ngiah hadooh wow phah leh ya waroh ki pyrtuid ki khynnah wa dooh thaw puræ Class-XI ha uni u snem.
Yei pyrtuid kini ki khynnah waroh dadep phah cha ka Office ka DSEO kamjooh cha u DC lyngba ka dorkhat wa da booh ha ka 22 tarik uni u bnai yow dawa na ka sorkar yow leh yeiwa bha tam ya ki khynnah.
I yachem yong ka JSM wa u Director toh ha ka yurim wow kyrpaad ya ka sorkar u thooh ki laad ki luti najrong wow e yumut yow ye u pynyoh thaw puræ ya waroh ki khynnah.
Neiliang yong u Director da e u ka rai wa paka wa neiliang ka sorkar leh ym em hi kwah ko u pyndooh thaw puræ ya ki khynnah, wei kattæ da man kiwa da pynkhreh u e ya ka Admission neibynta kitu ki khynnah wym yoh thaw ha ki sngi wow wan.
Ka JSM da ong ko wow yieñ skem ha ka yurim wow kyrpaad ya ka sorkar wow e Admission ya ki khynnah, deiwa ong leh wa da phah ko ya ka khubor cha ki khynnah wow emlang ko chirup wa ki neibynta u dawa pynyoh thaw puræ deiwa thooh ki laad ki luti deiwa choh dwar ha ki yung krehkaam ka sorkar kiwa pait yei puræ puthi.
Da pynkut deiwa ong wa u yang sa chi tayaaw wa lada ym krehkaam i jubab u Director, ym yohsa wow thhooh ki laad ki luti wow pyntikna wa yoh thaw puræ waroh.
Discussion about this post