Ka Supercare Hospital da dap ko dei kmen wei sñiawsarong wa ka Rikadeisuk Suting, kawa kreh kam ka Quality Nurse wa da yoh ko yei naam Young Leader Award (YLA) 2025 wa da e da ka Association of Nurse Executives India (ANEI).
Ya kani ka khusnaam wa kyrpang pynyoo ko yei sap yong ka wow sumaar ya kiwa kjut wa chitom wow lait ki nei jynjar wei wow pynbha ya i rukom sumaar wei wow yarap ya ki bru ha chnong ha thaw lyngba i kaam ki Nurse.
Da e ya kani ka khusnaam da e ha ka yalang ka ANEI, ka ANEICON 2025 wa da pynman ha Lulu Bolgatty International Convention Hall, Grand Hyatt Kochi, Kerala, ha ka 30 tarik u Naisan 2025 heiwa u kongsan ha ka yalang toh u Dr. Rajan N. Khobragade, u Additional Chief Secretary ka Health & Family Welfare, ka sorkar Kerala.
Kiwi kiwa da em ha ka yalang toh ki dkhot wa kongsan ka ANEI, kiwa kynthup ya ka Capt. Ajitha Nair (National President), Dr. Unmona Borgohain (National Vice President), Dr. Vincy Tribhuvan (National Secretary), Lt. Col (Dr.) Ajee K. L. (National Treasurer) wa ka Thankam Gomez (Founder President).
Ka Rikadeisuk da yoh ko ya kani ka khusnaam toh nei e kti ko met wei mynsien wow pynemkaam tikna ya ki rukom krehkaam ki Nurse wow pynsakhiat wa man kiwa biang wei wa da rap pynpsiah chooh chooh yei rukom sumaar wa kyrpang ya kiwa thiah kjut ha Supercare Hospital.
Man ko leh kawa da paw ha i rukom pyrkhat ha i sumaar deiwa wyrai wei ini da wanrah i chiboon i myntoi ya kiwa chitom.
Ki kaam wa da leh ka Rikadeisuk toh wa da yah wei kyrchaan da ka Mary B. Lyngdoh, ka Nursing Superintendent wa ka Rikadeilang Paslein, ka Deputy Nursing Superintendent.
Ka Supercare Hospital toh ka thaw sumaar wa nyngkong ha Meghalaya wow yoh ya ka NABH Accreditation kawa pura, kamjooh leh ha ka NABH Emergency wa ka NABH Nursing Excellence.
Da man ko leh ka Hospital wa nyngkong dooh ha Northeast India wow yoh ya ka NABH Nursing Excellence, wei ini pynyoo i yei e kti ka hospital wow wanrah yei sumaar wa bha tam wei wow kyrchaan ya kiwa kreh yong ka.
“Ini i yoh khusnaam ym pynyoo i du i jop wa samen yong ka Rikadeisuk tangwa i rukom pynyoo yei sñiawngooh neibynta i kreh chitom wei i kongsan yong ki Nurse waroh khamtam heini ha Northeast, heiwa kam ini i yahluti kyntu kynrong ko yei rukom e sumaar wa rap janai chooh chooh ha ki sngi wow wan,” da ong u Dr. R. S.Thangkhiew, u Managing Director ka Supercare Hospital.
U Damien Marwein uwa man u Chief Operating Officer da ong u, “Ha Supercare Hospital, kyntu i wei kyrchaan i ya ki Nurse wei ki Doctor yahluti wei e yumut ki khnang wow wanrah yei kylla iwa myntoi ha i rukom e sumaar ha Meghalaya waroh kawi.”
Discussion about this post