Kamwa jooh leh khlieh u snem, ha uni u snem leh ka Seiñraij Niamtre Ummulong da kynmoo ko ya ka sngi burom ya ka Bei Rymaw ha ka 7 tarik deiwa thung dieñ ha Loom Thangbru ka Seiñraij Niamtre Ummulong hajrong ka mat pdeiñ “I Yirngam ka Bei Rymaw, toh iwa pynim ya waroh ki jingthaw”.
Ha kani ka sngi chwa u sdang da em chwa ka yalang wa tbian wa da pynlai da u President ka Seiñraij Niamtre Ummulong, u Kamwathmupaïa Lamare, da yoh i klam tbian na u General Secretary ka Seiñraij, u Embhahlang Rymbai, katwa neiliang u Micky Shylla won da e u yei ngooh Blai chwa u sdang ha kani ka sngi.
Neiliang ka Seiñraij Niamtre Ummulong da yoh ko leh u thung da ki jait dieñ wa emkaam hei lehniam kam ki sla ladaw, sla lamet, u klongskoo, ki tre saro, u syiñ, u syiñ chyrmit, u dieñ sniñ wa kiwi tawon de ki jait thung kiwa emkaam hei lehniam najrong ki tre dieñ wa da thung.
Da yoh leh wow saam khusnaam ya ki 18 ngut ki bru kiwa yarap ya ka Seiñraij heipor wa iñ loom nadooh ki khon ka Niamtre kamjooh ya ki lok kiwa wan yarap na kiwi tawon ki niam leh.
Neiliang u Sainborlang Rymbai uwa man u Secretary I/c yong ka Land & Forestry Committee yong ka Seiñraij da e khublei u ya waroh kini ki 18 ngut kiwa yarap ya ka Seiñraij heipor wa iñ loom kamjooh leh ya waroh ki khon ka Seiñraij kiwa wan embyntalang ha kani ka ya thung dieñ, deiwa ong wa ini toh i kaamram hi yong i kam ki bru wow im sngi i ha ka sngi kylliang ka nongkylliang, kamjooh leh wow yada ya ka Bei Rymaw.
Da e khublei leh ya ka Soil & Water Conservation Department kawa em ha Mukhla yeiwa da e sñiawbha ko ya ki tre dieñ dei mynkna yow yoh u thung ha kani ka thaw.
Discussion about this post