Hadien wa dadep jia wa chah pynyap u Raja Raghuvanshi uwa wan uiñke suwari cha Sohra, da mih biang i dawa pynkrehkaam ya ka Inner Line Permit (ILP), heiwa neiliang ka sorkar ynnin ha ka yalang ki Montri sorkar namo ka Cabinet Meeting da chong pait ki deiwi ya ka Meghalaya Residents Safety and Security Act (MRSSA), 2016, yow pynskem ya kiwa rap kyllooid i pynkrehkaam ya ki kyndon.
Heiyatoh wa ini, neiliang u Montri ka chnat Tourism, u Paul Lyngdoh da ong u wa ka sorkar u pynboon ko yei lamieñ ka MRSSA hadien iwa jia ha Sohra yow pynduna yei wan psiah ki bru kiwa em i thmu wow leh ya ki kaam wa man pyrchah aiñ deiwa wan hei dur kiwa uiñke suwari.
Heiyatoh wa i dawa ILP, da ong u wa kani toh kawa dang chong ha kti ka sorkar pyrdi ha ka Ministry of Home Affairs wei neiliang ka sorkar jylla dadep chim ko da ka rai namo ka Resolution wow dawa pynkrehkaam ya ka ILP heiwa ka MHA da paan ko yei pynche kiwa da hap wow pynhun.
Da pyntip u leh wa kawi kawa da kylli toh kammon u leh hawa ka Meghalaya man ko ka jylla wa lai luti ymtoh ka thaw kawa kut ka lai luti neibhah kiwa sah ha kiwi ki jylla nadooh kiwa sah ha Barak Valley ka Assam, Mizoram wa Tripura hap ki wow lai luti napoh ka Meghalaya.
Tangwa da ong u wa lada puræ ya ka MRSSA da em ko boon iwa emkaam wei kattæ toh u pynheh ya kini wei pynpliah ki wei yeini daw wanrah dei tyrwa ha ka sorkar.
Heiyatoh won wa kiwa uiñke suwari da ong u wa da em ka Tourism App kawa ye wow booddien yei lai i wan ki Tourist nadooh ki kari wa pynemkaam ki wei da hap ki leh wow Register ha waroh ki thaw sah nadooh ki Homestay, ki Resort wa Hotel tangwa i pynemkaam ya kani ka App kattæ man ko du 50% donhi wei neini chakhmat ym chah de khlem da pynemkaam ya kani ka App.
U Paul da ong u leh wa ka thong ka aiñ MRSSA toh yow man chngaaiñ kiwa chong chonng ka Meghalaya wei daw pait biang ka deiwi yow chem ya kiwa duna ha ka yow rap khlan chooh chooh ko wei u man ko leh kawa bha neibynta kiwa wan uiñke suwari.
Discussion about this post