Ka Dorbar Ñiam yong ka Raij Jowai kamwa jooh man khlieh ki snem ha uni u snem leh da pynman ka ha ka 22 tarik uni u bnai da ka yachemlang wa kyrpang yong ki Kñi wa Ka Kchu Ka Siang ha Madan Kñia Pyrthat, Dulong Poh-Hali, Jowai.
Hei pynlai u Raymond Nartiang, Pator ka Raij Jowai kam u chongknor da kdar luti da i pynap blai pynap syiem na u Valentideo Paswet, Sangot Paswet katwa neiliang won u Puramon Kynjing, Pa Dolloi Elaka Jowai kam u khlieh ka niam khlieh ka Elaka neibynta i myntoi yong ki Kñi, ka Kchuu ka Siang da e u i klam i kappe wa kyrpang heiyatoh wa ka niam, ka rukom, dustur, riti.
U Pa Dolloi da ong u leh wa ka Dorbar Niam hapoh ka Raij Jowai sdang ko nadooh ki por kiwa u Syiem Pyrthat wanrah u ya ki soo ngut ki chipayu, ki khon Puri Blai kiwa man kiwa seiñ wa dang ya ka Raij ka chnong kamjooh ya ka niam ka rukom wei ka Dorbar Niam man ko leh ka Dorbar wa da hukum da u Trekirot, kamtæ kam ki pateiñ kani ka juk, ong u to yn nang pynkhroo chooh chooh yei man kyrpang kyntang ka Dorbar Niam nadooh na yung na sem hadooh ha Raij ha chnong.
U O.H. Toi, President ka Seiñraij Jowai ha kani ka dorbar da khana pynsñiaw u ya ki kaam kiwa ka Seiñraij da leh ko ha ka thong wow kyntu kynrong ya ka ñiam ka rukom, ka dustur riti kamjooh neibynta i miat i bha ka imlang sahlang yong ki khon ka Ñiamtre ha waroh ki liang, heiwa da kyrsu kyntu u leh ya ki Kñi, ka Kchu ka Siang wow yakrehlang khnang wa iwon iwon iwa ka Raij pyrkhat angnood ko u leh yow man iwa jop wei kawa poi cha ka thong.
Khaddooh ya kani ka dorbar da pynkut dei wa yoh ki kyntien khublei wei kitbok kitrwiang na u Raymond Nartiang, Pator ka Raij Jowai.
Discussion about this post