Ka National People’s Youth Front, Meghalaya State Unit chirup wa ka NPYF Jowai Block ynne ka sngi da pynkup burom ki ya ki khynnah wa lehbha ha ki Exam waphær waphær yong u snem 2025 napoh ka Jowai Constituency heiwa u MLA ka Jowai uwa man leh u State President ka NPYF, u Wailadmiki Shylla da man u kam u kongsan.
Ya ka yalang da pynman ha District Library Auditorium, Jowai heiwa da yoh i ngooh Blai na u Yoobiang Bamon uwa man u Asst. Secretary ka NPYF Jowai Block wa ki kyntien pdiang burom na u William E Pasweth uwa man u General Secretary ka NPYF, West Jaiñtia Hills District.
U Samehi Laloo uwa man u President ka NPYF, Jowai Block da ong u wa neiliang ka Block da pyrkthat ko iyi wow leh neibynta ki khynroo ka Block wei da pynsñiaw yeini ha u MLA, u Wailadmiki Shylla uwa dei pyrkhat jngai da ong u wa emkaam wow pynkut burom ya ki khynnah wa da lehbha ha ki Exam yong ki wei ini man i ka sien wa nyngkong dooh.
U Wailadmiki kam u kongsan hawa e i klam da ong u wa kani man ko ka sien wa nyngkong wa pynman ya ini i pynkup burom deiwa emkti ki chnat waphær waphær ha ka NPP nadooh ki manbei, ki warep, ki khynroo wa kiwi kiwi.
Da ong u wa ini i pynkup burom ymtoh iwa leh neibynta ka Party tangwa man ko kam chibynta wow tipmit wei wow pynchlur ya ki khynnah wow tia ki chaphrang deiwa ong leh wa ini ymtoh wa pynbiej Election tang wow tipmit yei kreh chitom ki khynnah neibhah ymtoh iwa suk wow yoh 80% ha ki Exam.
Chooh chooh da ong u wa ymtoh iwa suk wow pynman ya kani ka pynkup burom heiwa da tipmit du ya kiwa yoh 80% tam ha ka SSLC wa 70% ha ka HSSLC.
U Wailadmiki da e khublei u leh ya kwa sikai ka Government Girls Higher Secondary School, Jowai kawa dang sdang wot ya ka Commerce Stream ha ka HSSLC heiwa da ye wot u pynmih ya kawa yoh kyrdan Top-10 namo ka Topper.
Heijooh i por da ong u wa iwa chem chitom dooh katni toh i dooh kreh wei ini mih i nei kdong yei jooh bait i kreh tangwa emkaam u man kiwa pyrkhat jngai wei ñiaar pyrkhat deiwa e nongmuna wa heini ha Ri-loom Jaiñtia ym em tang uwi wot u Chartered Accountant heiwa hadooh katni hap thooh ya kini ki bru na Guwahati, Assam wa na kiwi ki thaw deiwa e nongmuna leh wa ki kreh wym em bru na Jaiñtia toh kam ki Chemical Engineer, ki Mining Engineer wa kiwi kiwi.
Da ong u leh wa ki seiñbhalang wa yakhih rah lama yong ki man-i-por ha Secretariat wow dawa ILP, tangwa emkaam u pyrkhat weileh wan ki cheini, wei i daw toh wa boon ki khih ki kreh cheini cha i.
Ha kani ka sngi da yoh leh ki kyntien sneiñ kynthu na u bru chemphang, u Omesa Shylla kamjooh na ki khynnah wa chah pynkup burom kiwa kynthup ya ka Sophia Niang kawa yoh yei kyrdan wa 6 ha ka HSSLC (Commerce) deiwa yoh 92.20% wa ka Geliloth Nazarene S. Kyndiah wa yoh 91.83% ha ka SSLC.
Ya ki kyntien khublei da yoh na u Tremiki Sutnga uwa man u Secretary ka NPYF, Jowai Unit.
Ha kani ka sngi da em hadooh 137 ngut wa chah pynkut burom kiwa kynthup ya 74 ngut ha ka SSLC wa 63 ha ka HSSLC.
Discussion about this post