Ki dkhot ka Kur Dkhar kiwa chong wa sah ha Shillong wa ha Jowai, ynne i step da yachemlang ki ha thaw Thangsati ka Kur Dkhar kawa em ha Iawmusiang, Jowai neibynta u pynkhroo u kyntu yei naam i burom u Tre ki Rot, ka Seiñjait, Seiñkynja, ka Blai, ka Yung Blai wa ki Blai Chnong, Blai Raij kamjooh ya ki Sangia Saret, ki yoh Sati kiwa em ha kani ka thaw Thangsati.
Da wan wow mihkhmat lut da waroh ki Kmai Yung Yung Blai chirup ki Kñi Rangbah, ki Symbood Kñi, ka Kchu ka Siang, ki khynroo khyllood ha deilang ki Phali ki Yuspong, ki Dahara ki Muka Thohsaru wa Khyrwong.
Hadien wa dep ka ngooh ka dem, u Dawan Dkhar uwa man u Kñi ka Kur Dkhar hawa klam cha kiwa thoh khubor ong u, neiliang ka Kur man-u-snem chisien wa dapoi i por lehniam ka Bei Seiñraij neibynta ki 4 sngi 3 yaaw, kam ka Kur Dkhar leh jooh pynman ko yeini i yachemlang ha kani ka thaw kyntang namo ka thaw Thangsati wa da booh da ki warim wajah neibynta wow e ka ngooh ka dem yow yoh dei chait i khiah khamtam leh neibynta ki sSngia Saret yoh ki u theh i kyrkhu kyrdoh ya ka Kur ka Jait.
Heijooh i por leh ong u, ka Kur Dkhar booh haroh ko i kyrpaad ya ki paidbah wa psiah wa mih uiñke apoh kani ka thaw wow man kiwa yakrehlang neibynta i khooid i jngiar dei wow man kiwa lehkhooid, khnang wa iwon iwon wa yoosuk ha kani ka thaw u nangpynyoosuk chooh chooh.
Ha kani ka sngi da yoh leh yei klam sneiñ kyntu na u C. Dkhar, uwa man kam uwa e buit ka kur ha ka yalang wa pynlai da u Wanmi Dkhar, Vice President katwa i klam e khublei da yoh na u Tiptremi Dkhar, General Secretary ka Kur.
Discussion about this post