Ka chnat krehkaam i puræ puthi hapoh ka West Jaiñtia Hills District wa kynthup ya ka District Mission Coordinator, SSA deilang ka District School Education Officer & District Project Coordinator (RMSA) ynne ka sngi kam chibynta ka dak i leh burom yei dap 5 snem i lai luti ka National Education Policy (NEP) 2020 da pynman ko ka yachemlang wa kyrpang ha Inclusive Education Resource Centre, Mihmyntdu hei emlang ka C. Lyngdoh, BMC-Thadlaskein Block wa ka D. Lathong, BMC-Laskien Block.
Ha kani ka yachemlang da wan wow ya embyntalang da ki khynnah wa emkaam u yoh i yarap wa kyrpang kiwa em hapoh ka Thadlaskein wa ka Laskein Block katwa neibynta won ka Amlarem Block ya kani ka jooh da pyndep ha ka 24 tarik.
Kani toh ka yalang kawa dawan lyngba ka Akhil Bharatiya Shiksha Samagam (ABSS) 2025 ha ka thong yong ka 5th Anniversary of National Education Policy (NEP) 2020, Distribution of Aids & Appliances for Children with Special Needs (CWSN).
Ha ka yalang wa tbian yong kani ka sngi hei pynlai ka R. Plain, IE Volunteer Laskien Block da yoh i klam yahkhmat hajrong ka thong yong kani ka lehkmen na u L.K. Singh, IE Coordinator SSA, West Jaiñtia Hills kamjooh leh i klam e mynsien ya ki manbei manpa na ka C. Lyngdoh, BMC-Thadlaskein Block.
Neiliang ka C. Lyngdoh da pynsñiaw ko i sñiawngooh sñiawburom wa khroo ya ki manbei manpa kiwa chim ka yukit wa khia neibynta ki khon ki nat kiwa emkaam sakhiat u yoh yei yarap wa kyrpang.
Ka C. Lyngdoh da ong ko leh ka sokar ha ka thong wow kyntu kynrong yei puræ puthi ki khynnah wa emkaam u yoh i yarap wa kyrpang da yaleh pyrchang ko leh yeiwa miat wa bha tam kamtæ khut ko leh ya ki manbei manpa wow yakrehlang na ki por cha ki por.
Chooh chooh da kyrsu kyntu ko ya ki manbei manpa wow pynemkaam hok ki ya kini ki tiar neibynta i suk wei myntoi ki khon ki nat yong ki ymtoh u pynemkaam bakla ya ki tiar ha kiwi ki rukom ki wym yatoh dur toh sap.
Discussion about this post