Ka Balang Presbyterian Mynso-B, West Jaiñtia Hills District kam chibynta i pynkhreh wow pdiang ya ka yaseiñ Synod Samla ka wow man ha u snem 2026 nadooh ka 27 tarik u Feb hadooh 1 tarik u March 2026, ynne ka sngi da pynsñiaw ko i sñiawngooh wei e khublei ya u Symbood Montri Rangbah ka sorkar jylla, u Sñiawbhalang Dhar hajrong i chimkhia yong oo wow yarap pynbha pynmiat ya ka madan wow pynman yaseiñ.
Yeini i sñiawngooh wei e khublei, ka Balang Presbyterian Mynso-B da pynsñiaw ko heipor wa ki dkhot Committee ka Balang hiar lai pait ki ya kani ka madan wa dadep pynmiat pynwandur.
Neiliang u H. Dhar, Secretary Balang Mynso-B, uwa man leh u Rangbah Balang khana u wa hei lai luti yong ki wow pynkhreh ya ka Synod Samla 2026, dapoi li pan yarap ki chadooh cha u Symbood Montri Rangbah ka jylla u Sñiawbhalang Dhar wei oo leh khlem kyrngah da pynyoh u ki laad yarap.
Najrong kani ka madan khana u wa dang em chiboon i emkaam kam ki sarok, ki luti syngkieñ (Internal Road) hapoh chnong kiwa da sih chawa palatpood, u sarok wow lai cha yungmane, neitæ wow chna pynbha ya ka pchem yungmane wa kiwi kiwi de kiwa emkaam.
“Kamwa man u u bru wa chimkhia wei wa em mynsien u yarap ya kiwa emkaam yarap, yooluti i wa neibynta sa kiwi tawon wa emkaam yong ki leh daw yoh yarap chooh i na oo,” da ong u H. Dhar, Secretary Balang Mynso-B.
Ha kani ka sngi, ka Balang Mynso-B da pynsñiaw haroh ko i sñiawngooh ya ka Kur Lyngdoh wa da e sñiawbha ki kani ka thaw wow pynman yaseiñ Synod.
Hawa kylli won lada em mo i yarap wa da yoh ki na u MLA ka thaaiñ u Comingone Ymbon, u Tbn. E. Syntem khana u wa hei lai paan yarap yong ki na oo, da e u i kyrmen wow pait yei emkaam yong ki, kamtæ ki leh em ki i kyrmen wa daw yarap hi u neibynta i pynkhreh yong ki u pdiang Synod.
Ha kani ka sngi neiliang ki dkhot Committee ka Balang da emlang leh u Tbn. T. Myrchiang, u Tbn. P.S. Ryngkhlem, u O. War, u M. Lyngdoh, u R.W. Lamin wa u T.W. Syntem.
Discussion about this post