Ka Committee on Government Assurances yong ka Meghalaya Legislative Assembly, ha ka 11 tarik uni u bnai da lai ko cha Ri-Bhoi District yow lai pait ya ki karkhana kamjooh ka thaw ri syiar.
Da lai pait leh ya ka thaw pynmih ya ki baam syiar kawa tip kam ka Poultry Feed Manufacturing Unit, neitæ ka thaw ri syiar ka sorkar wa em ha Kyrdemkulai wei da lai pait leh ya ka RNB Cement Plant Ltd wa em ha Umiam Industrial Area.
Ya kani ka Committee da khlieh kam u Chairman da u Renikton Lyngdoh Tongkhar, MLA wei da emlang ki dkhot wa kynthup ya u Dr. Celestine Lyngdoh, u Matthew B. Kurbah wa u Ollan Singh Suin.
U Chairman hawa e yei klam da khana u wa hei step da lai nyngkong cha Barapani yow lai pait lai sylli ya ka Poultry Feed Manufacturing Unit deilang ka RNB Cement Plant wa em ha Umiam Industrial Area. Hadien ini da lai cha ka Government Poultry Farm wa em ha Kyrdemkulai.
Da ong u leh wa kmen wow yoo wa kani ka thaw ri syiar ka sorkar toh kawa miat bha kawa ya ryngkat wa ki thaw wa pynlai da ki bru samen wot hadien wa da krehkaam ko da boon snem leh dang man ko kawa miat wa bha wei ki mar wa pynmih leh toh kiwa miat.
Da ong u leh wa kani ka thaw toh u pyrkhat ko wow e yarap e sikai ya kitu kiwa kwah wow seiñkhih yow boon leh ki warep neibhah em boon ki khynroo khyllood kiwa da biang ka puræ puthi tangwa ym yoh kreh sorkar. Kamtæ ka kaam rep toh kawa ye u wailaad ya kiwa kwah kreh neibhah ki mar wa pynmih toh kiwa lai yaaw bha.
Kamtæ da kyntu u ya ka chnat Animal Husbandry and Veterinary wow pyrkhat ki u pynheh ya kani ka Farm ym du wow ye u pynmih rap boon ki mar tangwa wot wow pynmih kreh deiwa yaroh u leh yeini wa biang i rukom pynneh pynsah ya kani ka Farm deiwa yooluti wa daw pteiñ kamni ha ki snem wow wan.
Da ya emlang ha kani ka sngi deilang ki Doctor wa ki sahep ka chnat Animal Husbandry and Veterinary chirup kiwa kreh ka Meghalaya Legislative Assembly Secretariat.
Discussion about this post