60% dadep i kreh ya ka yingkieñ na Assam cha Meghalaya najrong ka wah Brahmaputra

I kreh ya kawi na ki Project wa heh dooh ha ka ri yow chna ya ka yingkieñ 4-Lane kawa chongdor Rs. 4,997 klur najrong ka wah Brahmaputra da man iwa lai chaaid chaaid wow pynyabi ya ka Dhubri, Assam wa ka Phulbari, Meghalaya.

Ini i kreh kamwa man kattæ dadep 60% wei kani ka yingkieñ toh kawa jrong 12.62 km wei man ko kawa emkaam bha ha ka thaaiñ chaneiñ mihsngi.

Kani ka yingkieñ da man ko leh kawa emkaam khamtam hadien i thmu ka sorkar pyrdi u booh ya ka Four Lane wow pynyabi ya ka Phulbari wa Shillong yeiwa ka National Highways & Infrastructure Development Corporation Limited (NHIDCL) da khut Tender ko wei wow pait bniah ya ka Detailed Project Report (DPR).

Kani ka yingkieñ u lai ko na u sarokbah National Highway 127B heiwa da e kti wow kreh ya ka da ka Larsen & Toubro (L&T), heiwa da booh por wow pyndep ha u Naikhynde 2028.

Related posts

Ha uni u bnai u yoh ka tulop ki Contractual Nurse: Wailadmiki

January 14, 2026

Da sdang ya ka Association kari kamai yow pynsuk ya kiwa lai Phramer-Saphai-Umrangso

January 14, 2026

Ya ka yingkieñ da pynwandur da ka JICA kawa da e ram leh wow chna ka NHIDCL ya ka.

Katkam wa man katni, ki bru kit tiar ki hapyrdi ka Dhubri wa Phulbari najrong ka wah Brahmaputra da ki lieñ næ deiwa lai na u sarok na Goalpara wa Bongaigaon.

Deiwa pyndep ya kani ka yingkieñ daw pynduna ko yei por wa chim wow lai chiliang heiwa daw chimpor du 35-40 minit donhi.