Ka Jaiñtia Joint Alliance wa kynthup ya ar tylli ki seiñbhalang kitæ toh ka War Jaiñtia Student Union (WJSU) wa ka Jaiñtia Youth Federation (JYF), ynne ka sngi lyngba u Chairman yong ka, u Ombormi Tariang, u General Secretary, u Everest Langstang, u Chief Adviser yong ka, u Alban Gashnga deilang ki dkhot da pynbna ki wow lai choh lai tied noh ya ka dwar yong ka yung bichaar heiyatoh wa i pynkreh ya ka madan Artificial Turf kawa em ha Ladjaplem, Amlarem Civil Sub-Division.
I daw wa pynkhreh ki wow lai cha ka yung bichaar toh wym em hun ki hajrong i pynkreh ya kani ka madan deiwa pynbaad toh iwa kreh khalær wei wym em yahaap katkam ka poisa wa da mang palat Rs. 7.92 klur.
Khana ki wa hei lai luti yong ki wow paan pynche lyngba ka RTI na ka State Sports Council leh ym em yoh ki yei jubab wa hun.
“Yoo i wa ha kiwi ki madan yong ki Block næ Sub-Division chynna wa man kam ki madan wa sakhiat katwa kani ha Ladjaplem won yoo lakam kawa pyntam pynheh donhi ya ka mandan Futsal najrong i rukom ker leh i wym yoo yahaap hiwot wow yalehke da ki bru,” da ong u Alban Gashnga.
Neiliang ka Jaiñtia Joint Alliance kwah ki wa ka sorkar jylla u pynkreh hok ko ya ki Scheme wa yoh na ka sorkar India khnang wa ki khon khynroo khyllood ka thaaiñ leh u yoh sakhiat ki u pynyoo yei sap wa em ki wei wow man leh ka madan wa neh slem.
Katkam ka RTI khana ki wa i kreh la 40% dadep iwa mut dang sah sa 60%, wei hei lai luti yong ki ong ki ka chnat Sports da pynksan ko ya ka yurim yong ka hi wei neiliang yong ki leh pynksan ki ya ka yurim yong ki hi, kamtæ hei kut laad rai ki wow lai mih cha ka yung bichaar khnang yow chem yei sakhiat wei ki paidbah ka thaaiñ Amlarem leh yow yoh myntoi ki kamwa toh hok.
Discussion about this post