Ka Seiñraij Chnong Sohkymphor kawa haap hapoh ka Elaka Shangpung ynne ka sngi da pyndep ko ya ka lehniam Behdieñkhlam wa chisien chisnem ha Madan Noh Rong (Rot) ha ka chnong Sohkymphor, East Jaiñtia Hills.
Ha kani ka sngi u MLA ka thaaiñ uwa man leh u Montri ka sorkar jylla, u Kyrmen Shylla da man u kam u kongsan, hei emlang ki MDC ka JHADC wa kiwi kiwi.
Ynne ha Madan Noh Rong da e ya i ngooh i dem, i suit i choor da ki Kñi ki le kur ka chnong wa kynthup ya ka kur Lyngdoh, Tang wa Talang.
Ha kani ka sngi da em ka yalang wa tbian wa pynlai da u President ka Seiñraij, u Marlistar Lyngdoh.
Hawa e i klam kam u kongsan, u Kyrmen da kitbok kitrwiang u ya waroh kiwa wan cha kani ka Behdieñkhlam khamtam ki khon ka Seiñraij Chnong Sohkymphor.
Da ong u wa kamwa sikai ki warim da em chiboon ki Behdieñkhlam wa da pynman hapoh ka Ri-loom Jaiñtia wei ngait skem u wa daw ye u beh ya ka khlam wa iwa sih nakhap ka imlang sahlang.
Chooh chooh da ong u wa ka East Jaiñtia man ko kawa hiar bha ha kiwa boon ki bynta tangwa ha ka kjut HIV man ko kawa nyngkong ha ka jylla kamtæ da kyrpaad u wow yakhun ya kani ka kjut kamwa yakhun ya ka khlam.
Da ong u wa ymtoh u murieh i ya kiwa dih drugs wei emkaam u sneiñ kyntu ya ki wei wow e mynsien ya ki kammon wow ye ki u kiar yei drugs.
Ynne da em hadooh 11 tylli ki Rong wa da wanrah ha Madan Noh Rong heiwa da man ko kawa phooh wa phieñ.
Discussion about this post