Ar ngut ki kynthai wa yalehbol na Meghalaya da chah jied ki kam kiwa yalehke ki wow mihkhmat ya ka ri ha ka South Asian Football Federation (SAAF) U-17 Women’s Championship 2025 wa daw pynman ha Bhutan wei yei pyrtuid kiwa yalehke wa em 23 ngut da pynbna da ka All India Football Federation ynne ka sngi.
Kini kiwa chah jied toh ka Bonifilia Shullai kawa na Shillong kawa yalehke kam ka Midfielder wa ka Alisha Lyngdoh kawa na chnong Diengshynrum, East Jaiñtia Hills kawa yalehke kam ka Defender.
Ka Bonifilia toh kawa da jooh mihkhmat ya ka India ha ka U-16 heiwa ynnin u snem ha ka U-16 SAFF Tournament da rem ka India ha ka Final. Da jooh yalehke ko leh ya ka Rangdajied United, ka Garhwal FC, ka Bengaluru FC U-15, ka 4 For All Football Academy wa ka Bhaichung Bhutia School.
Ka Alisha won toh kawa jooh yalehke ya ka Rangdajied wei da chimbynta ko leh ha ka Inter Kashi ha ka Indian Women’s League 2024-25.
Kani ka Tournament wa daw pynman ha Thimphu, Bhutan, daw sdang ko nadooh ka 20 hadooh ka 31 tarik uni u bnai heiwa ka India daw yachem ko wa ka Nepal, Bangladesh wa Bhutan mar arsien.
Neiliang u Montri Rangbah ka jylla, u Conrad K Sangma da pynsñiaw u yei sñiaw sarong wow yoo yei pyrtuid kini ki ar ngut deiwa kyntu ya ki paidbah wow e yei kyrchaan.
Neiliang ka East Jaintia Hills District Football Association leh da pynsñiaw ko yei kmen yeiwa chah jied ka Alisha wei da pyn-eh-daw ki yow ye ko wow ku chaneiñ yow wanrah burom ya ka East Jaiñtia Hills.
Discussion about this post