Sdang ka yakhih ha waroh ki nongbah ka North East yow dawa beh ya kiwa chong chnong pyrchah aiñ

Ka North East Students’ Organisation (NESO) deiwa ya krehlang wa kiwi ki seiñ da pynman ki ya ka Sit-In-Strike ha waroh ki nongbah ka thaaiñ chaneiñ mihsngi ynne wa kynthup ha Shillong, Guwahati, Itanagar, Aizawl, Kohima, Imphal wa Agartala yow dawa khyndang wei beh ya waroh kiwa chong chnong pyrchah aiñ ha ka thaaiñ.

Ha Shillong da pynman ya kani ka yakhih deiwa ya krehlang ka NESO wa ka KSU yow pynbor ya ka sorkar jylla deilang ka sorkar pyrdi yow chimkhia ki yeini i psiah laitlan wei pyrchah aiñ chapoh ka thaaiñ.

I dawa leh man ko yow wanrah ki aiñ wa khlan wa ki laad yada yow yaleh pyrchah yeini wan psiah kiwa na baar wei da man leh iwa eh bha katni neibhah boon kini ki bru da yoh ki hadooh ki Aadhaar Card, ki EPIC deiwa man tre chnong pyrchah ya ka aiñ. Wei ini da booh ko hei maa ya kiwa khian paaid ka thaaiñ North East, kamtæ ka NESO da dawa ko leh ya ka National Register of Citizens (NRC) ha waroh kawi ka thaaiñ wei wow pait biang deiwi ya ki kot ki sla wei lada chem toh kiwa deiwa leh thok wow phah liwan ki cha ki chnong yong ki hi.

U Chief Advisor ka NESO, u Samujjal Kumar Bhattacharya da ong u wa ini i yakhih toh neibynta ka thaaiñ North East waroh kawi wow dawa wow thooh wei wow phah liwan lut ya ki Bangladeshi na ka thaaiñ neibhah wa booh ki hei maa ya ki tre thaw weiwa da yoo yi wa da jia ha Tripura wa Assam.

Da pynbaad u wa da kyntoor ki Bangladeshi ya u pood ki jaitbru Ri-loom, ki khloo wa ki thaw wa da yada ka sorkar wei da ktah ki yei rukom chong i sah ki bru ha Assam yeiwa da kubur leh da u Prime Minister ka ri.

Related posts

Chah pynjæd ki sula ka manbei hei yachoh hapyrdi kiwa na Meghalaya wa Assam

August 18, 2025

Yap i khynboo wa dang dep kha wa haap najrong palong hapoh Hospital

August 18, 2025

Ka NESO da dawa ko wow booh por wow pynkhreh ya ka Assam Accord, wow kær ya u pood ka India-Bangladesh, u leh ya ka National Register of Citizens (NRC) ha ka thaaiñ mihsngi wei wow yada ya ki jaitbru tre thaw namo (Indigenous Community).

U Bhattacharya da ban u wa ka CAA ym em ware pynkrehkaam ya ka ha Assam lada pait ya ka thaaiñ chaneiñ mihsngi heiwa da ong u wa lada ka CAA ym krehkaam ko ha Mizoram, Nagaland, Manipur, Arunachal wa kiwa boon ki bynta ka Meghalaya wa Tripura, ha Assam leh ymtoh u krehkaam ko deiwa pynrap wa lada em 35 District ha Assam weileh ha ki 27 District krehkaam ka CAA.

Da maham u wow pteiñ i yakhih kat hadooh wa ka sorkar pyrdi u leh ko yeiwa emkaam wow yada ya ki paidbah ka thaaiñ.