Hajrong i thmu ka sorkar Meghalaya lyngba ka chnat puræ puthi yow pynkrehkam noh da ka Meghalaya Education Grant (MEG) neibynta kiwa sikai Lower Primary ha ka jylla deiwa yasoi soskular MoU wa ka Mother’s Union ha ka 19 tarik u June 2025 ha Tura. Kamtæ neiliang kiwa sikai Deficit wa Govt LP School hapoh ka lama yong ka All Meghalaya Primary School Teacher’s Association (AMPSTA) ynne ka sngi da mih ki chakhmat u pyrchah yeini i thmu ka sorkar deiwa sdang chwa ka yakhih na Ri-loom Jaiñtia wa da pynman ha Jowai lyngba i lai Rally wa i yalang ha madan Jrisaleiñ.
Kiwa e i klam ha kani ka sngi wa kynthup ki ya ka Vegonia Nongpluh, Asst. General Secretary AMPSTA, ka C. Daribha Synrem, Joint Secretary AMPSTA, u Heavenly War, Secretary Amalrem Unit kiwa da pynsñiaw yei daw wa pyrchah najrong wa em leh ki bynta wym che lada pynkrehkam ya kani ka MEG wa kynthup yei kaam poisa poilaiñ wa kiwi.
Ong ki wa lada pyrkhat du neibynta samen kiwa da em chwa hei kaam sikai, kani ka MoU ym ktah ko, tangwa i daw wa mih yakhun ki toh wa mar ya chong ngiah ki, kiwa chimkti hadien yong ki won daw haap ki hapoh ka Meghalaya Education Grant iwa mut ki pateiñ wa hadien ym yoh de ki ka laad kamwa yoh ki.
Ong haroh ki wa lada ka sorkar kwah ko u kynrong yei puræ puthi da toh u pyrkhat ko da kiwi ki laad wa rap biang najrong wow thung chooh kiwa sikai ha ki thaw wa thylli wa kiwa yoo emkaam.
Neiliang u FC Shullai, General Secretary AMPSTA ong u wa ya ka Meghalaya Education Grant (MEG) kawa ka sorkar jylla da soi soskular ko wa ka Mother’s Union ha ka 19 tarik u June 2025 ha Tura toh deiwa khut ya kiwa sikai neibynta u e kti noh ya 20 tylli ki LP School cha ka Mother’s Union.
Da pynbaad u wa ini toh i buit ki heh sorkar ka chnat Education yow yahbakla ya ka sorkar neibhah wa em napyrdi ki sahep sorkar kiwa na baar jylla kiwa hadien wa dep pynkulmar tæ liwan kreh won ki chawi wei daw yachruit won para i.
Tæ oo kam uwa yahkhmat u yakhun pyrchah u deiwa ong u wa da chah kynthah u ha ka Mother’s Union, wei hei yah luti yong oo napyrdi ki 20 tylli ki skur leh da em kiwa pynsñiaw i pyrchah hajrong i thmu kani ka MoU.
Da ong u wa ha ka 26 tarik u June kam ki dkhot ka AMPSTA da lai e kti dorkhat ha u Chief Minister deiwa booh por chi bnai kamtæ ha ka 8 tarik uni u bnai ka sorkar da pynsangeh chwa ko ya ka hukum wa pynmih ko.
Tangwa ong won u ymtip won boi daw pynkrehkaam biang ki ka ha iwon iwon i por wei hajrong ini daw chong pyrkhat ki ha ka State Level.
U Shullai hawa pynsñiaw leh hajrong i jop i lai luti ka seiñ wa da ye u pynsangeh chwa ya ka hukum wa da pymih ka sorkar, da pynsñiaw haroh u ya kattu katni tylli ki mat wa jop itæ toh wa ka sorkar da pynsangeh ko ya ka hukum wow phah chong-ngiah ki hei rta wa 58 snem deiwa booh 60 snem, neitæ i dawa ya ka Arrear DA, ong u ha Ri-Bhoi kiwa sikai da yoh ki ya ka 46% wei ka Order da em ko wa oo.
Kani ka yakhih ka seiñ AMPSTA daw pteiñ ko leh ha kiwi won ki District ka jylla chwa wow chim ki ya ka rai u mih yakhih ha ka State Level.
Discussion about this post