Ha ka Career Guidance Seminar wa da pynman da ka yung krehkaam u Deputy Commissioner ka West Jaiñtia Hills District ha ka 22 tarik uni u bnai ha District Library Auditorium, Mynthong, Jowai hajrong kammon u pynsñiawthooh ya ki khynnah skur yow tipsap ki u lai luti yow bha u miat ka mynried yong ki, neiliang u MLA ka Jowai, u Wailadmiki Shylla uwa man kam u kongsan ha kani ka sngi, da chim u leh ka laad wow e yarap poisa Rs.1 lak na ka kata yong oo hi cha u Deiwitawan Synnah uwa chong wa sah ha Loomiongkjam, Jowai uwa man uwa chna sur wei uwa rwai wa pawnaam ka District kamjooh ka ri-loom Jaiñtia waroh kawi.
Heiyatoh wa kani ka yarap song poisa, u Wailadmiki da ong u wa kani man ko kam chibynta u pynchlur u e mynsien yei sap wa em u Dewitawan, neitæ i burom hajrong iwa da leh u wow pynbna naam yei ktien Pnar lyngba i sur wa da lai rwai u ha kylleiñ ki thaw ka jylla, wei khamtam wow yarap leh yei wow wai u ya ka chlem e sikai rwai namo ka Music School ka yong oo hi.
U Wailadmiki heiyatoh wa kani ka Seminar da ban joor u hajrong i emkaam ka Career Counselling neibynta ki khynnah skur, khnang yow tipsap ki kammon u lai luti hei im ki wa chaphrang, neibhah i dooh khih dooh kreh katni ym du wa maad ki bru wa khlem puræ, tangwa wot kiwa da em i stat i tip leh da maad ki yei jooh.
Kamtæ da ong u wa emkaam wow pynman ya kam kani yow yahluti ya ki khynnah yow lait ki u wiar luti wei yow lait leh u sepai ka sap ka phong yong ki yow tip ki u jied deiwa biang yow lait u bakla wei yow poi cha ka thong deiwa leh yeiwa sñiawsuk hi ki.
Ha kani ka sngi da emlang u Deputy Commissioner, u Abhinav Kumar Singh, u Superintendent of Police, u Jaspal Singh Dhanoa deilang u District & Session Judge ka West Jaiñtia Hills, u N.A. Khan, MHJS wa kiwi de.
Discussion about this post