Chirup i pynkup burom da ka District Award ya kiwa sikai da lehkmen ya ka Teachers’ Day ha Khliehriat

Chirup wa ka ri waroh kawi, ka East Jaiñtia Hills District ynne da lehkmen ko ya ka 64^th Teachers’ Day ha ka yalang wa da pynman ha Auditorium ka Khliehriat Higher Secondary School da ka yung krehkaam ka District School Education Officer (DSEO), East Jaiñtia Hills District heiwa da wan wow embynta da ka MDC ka Rymbai- Khliehriat, ka Violet Lyngdoh kam ka kongsan chirup u Additional Deputy Commissioner ka District, u S.R. Marak, deilang ka District School Education Officer (DSEO) warim ka East Jaiñtia Hills District, ka P. Dkhar, u Sub-Divisional School Education Officer (SDEO), East Jaintia Hills District, u Onikson Sumer, ki Principal, ki khynnah skur wa kiwi de.

Ka kongsan da klam ko hajrong i kaamram kiwa sikai yow pynwandur ya ki khynnah skur hadooh ka imlang sahlang, kamtæ da e khublei ko ya ki ha kani ka sngi wa kyrpang yong ki kamjooh ya kitu kiwa yoh ya ka District, State wa National Award yei kreh chitom ki wow yah ya ki khynnah ha ka luti wa toh wa biang.

Da ong ko leh kiwa sikai man ki kam ka charak kawa chba yow pynchngaaiñ yei mynsien ki bru wei i kreh kam kiwa sikai toh iwa pynhun bha ym du ya kiwa sikai tangwa ya ki khynnah leh.

Ha kani ka sngi da saam leh ya ki District Award 2025 cha kiwa sikai ha ki Secondary wa Primary Level kamjooh ya ka District Best Guide Captain 2025.

Related posts

Charge Sheet ki pulit pyrchah ya ka Sonam deilang ki soo ngut kiwi wa emkti wow pynyap ya u Raja

September 5, 2025

Leh burom ka West Jaiñtia ya kiwa sikai skur ha ka 64th Teachers’ Day

September 5, 2025

Ka Assistant Teacher ka Khliehriat Higher Secondary School, Khliehriat, ka Laura Suja, B.A., B.Ed. da jop ko ya ka Secondary Level Award, u Headmaster ka Saipung Government U.P. School, Saipung, u Lairemzoma Thianglai, M.A., B.Ed, D.El.Ed da yoh u ya ka Upper Primary Level Award wa u Head Teacher ka Sohkymphor Nein Government L.P. School, Sohkymphor, u Wiles Singh Langstang, P.U. (Science) da yoh u ya ka Lower Primary Level Award katwa yei naam District Best Guide Captain 2025 da yoh ka Memorial Nongtdu na Khliehriat Presbyterian Higher Secondary School, Khliehriat.

Da yoh leh yei chaad i rwai da ki khynnah skur ka District yow pynphooh pynphieñ ya kani ka sngi.

Kani ka lehkmen da man ko kawa sahkynmoo neibhah wa uwa sikai ka District uwa man leh u Principal ka K.B Memorial Secondary School, Wapung, u Dr. Heipor Uni Bang da yoh u ya ka National Teacher Award 2025 katwa ka Assistant Teacher ka Tluh Secondary School, Tluh, ka Tasiana Kympat da yoh ko ya ka State Award 2025.