U Dr. Heipor Uni Bang, uwa man u Principal wei uwa sdang ya ka K.B. Memorial Secondary School, East Jaiñtia Hills, ynne da pdiang u ya ka National Teachers’ Award 2025 wei man u uwi na ki 45 ngut wow pdiang ya ini i naam na kylleiñ ka ri wa da e kti da ka President ka ri, ka Droupadi Murmu ha Vigyan Bhawan, New Delhi heipor wa lehkmen ya ka Teachers’ Day.
U Dr. Bang da yoh u yeini i naam nei kreh chitom u heiyatoh wa i stat i tip, i pynneh ya ka mariang wa i chakri ya ka imlang sahlang.
Da yoh u yei kyrdan Ph.D ha ka Environmental Management na William Carey University, Nongmensong, hajrong ka phang “Challenges and Opportunities of Solid Waste Management of East Jaiñtia Hills District of Meghalaya.”
Da thoh u leh ya kiwa boon ki Research Paper kiwa da pynmih da ka International Journal of Research Education and Scientific Methods (2021) wa ka International Journal of Ecology and Environmental Science (2020).
Chooh chooh da thoh u ya ki kot Khasi wa da pynemkaam hadooh ka Class IV wei dei langær pynthymme u ya ki kot General Knowledge wa kiwi heiyatoh wa ka District kamjooh ka jylla.
U Dr. Bang da sdang u wow hikai nadooh u 2009 hadien wa pyndep ya ka MSc Botany na North-Eastern Hill University (NEHU).
Da jooh sikai u ha Little Flower Secondary School, Khliehriat wa ha Rymbai Presbyterian Higher Secondary School chwa wow sdang ya ka K.B. Memorial Secondary School ha u snem 2013 hadien wa mih i dawa wow sdang ya ka English-Medium School.
Hapoh i yahkhmat u da ku bha kani ka skur liang wanang hadooh ki kaam Sport heiwa ha ka State Subroto Mukherjee Cup (Under-14 Boys) ha u 2023 wa 2025 dapoi Final ki hapoh ka jylla wei ha kiwi ki yakob leh dapoi ki chakhmat kam ha ka Quiz, Debate, Essay wa kiwi de hapoh ka District wow pynmyntoi ya ki khynnah.
Kam uwa sikai, u Dr. Bang da chakri u leh ha ka imlang sahlang wei da man u leh kam u dkhot ka Juvenile Justice Board, Khliehriat, u dkhot ka Red Cross Society ha u 2015–2016, uwa sikai ha Thomas Jones Synod College, Jowai ha ki snem 2014-2017.
Neiliang u Dr. Bang da ong u wa ini i naam wa yoh u man i tipmit ya i kreh ka yung ka sem yong oo wa ki para wakreh u wei khamtam ka chnat puræ puthi ka sorkar jylla.
Da e ngooh u leh ya u Blai wa da yahluti ya oo wow man kam uwa sikai wow chakri ya ka imlang sahlang.
Da kyntu u leh wow yoh kyrchaan poisa ki skur samen khnang wow ye chooh ki wow pynku yei stat i tip hapoh ka jylla khamtam wow ye u su ya ka tulop kiwa sikai.
Da ban joor u leh yei emkaam wow pynkrehkaam ya ka National Education Policy (NEP), i kynthup ya ka ktien Khasi ha ka Eighth Schedule ka Constitution, wei wow kyrchaan ya ki khynnah wa emkaam yarap.
Discussion about this post