Hadien wa joor i chah tooh ki thuk-thuk na East Khasi Hills khamtam na Shillong, neiliang ki pulit ka Mawryngkneng PS ha ka 4 tarik uni u bnai heipor kamwa 3:30 i step da pynman ki yei kynreh ya ki kari ar chaka ha Mawmang wei heini i por da yoo ya kawi ka Scooty wa wan neiliang Shillong kawa da yut mar ya yoo ya ki pulit.
Kamtæ ki pulit da pynman ki yei yang khap wei heipor kamwa 3:50 i step da wan biang kani ka Scooty wei manda yoo wa em biang ki pulit da yut biang ko tangwa da kdong ki pulit ka wei da yoh ki u kem ya uwa chong ha ka uwa tip kam u Nehlang Lamare (24 snem) uwa na Barato, West Jaiñtia Hills katwa uwa yah da yut u deilang ka Scooty.
Hadien won da chem ya kani ka Scooty wa em Number ML-05X-5909 wa da em wa ieh ka ha rood sarok ka Mawryngkneng.
Ya uwa chah kem da rah cha Mawryngkneng Police Station wei da pynman leh yei thooh ya uwa yah ya ka Scooty heiwa da chem oo heipor kamwa 5:15 i step na Lad Lwang, Mawryngkneng uwa tip kam u Klement Timung, uwa sah ha Caroline Colony, Jowai.
Hawa pynman yei takit da chem wa ya kani ka Scooty toh kawa da tooh na Lapalang, Shillong kawa da Register Case ha Rynjah Police Station.
Heipor sngi won da yoh wow kem sa le ngut kiwa emkti hei tooh thuk-thuk kiwa tip kam u Peter Pohrmen (18 snem) uwa na Umdoh, Dawki, WJH, u Vicky Dkhar (20 snem) uwa na Bakur, Dawki, WJH wa u Romeo Ryngksai (24 snem) uwa na Bakur, Dawki hi wei kini toh kiwa rah ya ki thuk-thuk wa chah tooh yow e kti cha ki bru wa em ha Bangladesh.
Deiwa phla kini, ki pulit ka East Khasi Hills deilang ki pulit ka West Jaiñtia Hills da pynman ki yei lai kynreh hei miet ka 4 tarik hadooh wa poi ka 5 tarik heiwa da kem leh sa kiwa kiwa emkti ha ini i kaam kiwa kynthup ya:
U Deimionjongmi Paslein (25 snem) uwa na Kseh, EJH.
U Barister Lamare (20 snem), u Lastborn Lamare (21 snem) wa uwi uwa dang 15 snem kiwa waroh na Barato, WJH.
Da kem leh ya ki Bangladeshi kiwa chimkti ya ki thuk-thuk wa chah tooh:
U Kaswar Mia (40 snem), u Ali Hussain (40 snem), u Md. Rafiq Miah (28 snem), u Md. Jil Miah (30 snem) wa u Monnan Miah (38 snem) kiwa waroh na Sonamganj District, Bangladesh.
Kiwi won toh kiwa na Sylheti District, Bangladesh kiwa kynthup ya u Md. Rumel Miah (20 snem), u Md. Shabaj Miah (24 snem) neitæ u Ridial Hussian (19 snem) uwa na Tangan District, Bangladesh wa u Samiya Mias (25 snem) uwa na Hobiganj District wa uwi won uwa dang 17 snem.
Waroh da em 17 ngut kiwa chah kem wa 2 ngut kiwa hapoh 18 snem kiwa da chah kem kiwa emkti ha ini i kaam wei da rah ki hakhmat ka yung bichaar.
Discussion about this post