Ki pulit ka East Khasi Hills da Charge Sheet ki ya ka Sonam Raghuvanshi, u Raj Singh Kushwaha, u Vishal Singh Chauhan, u Aakash Singh Rajput wa u Aanand Kurmi deiwa pynngat ki hapoh ka Section 103 (1)/238 (a)/61 (2) ka BNS, 2023 heiyatoh wa i chah pynyap u Raja Raghuvanshi.
Kani ka Charge Sheet wa em 790 sla da booh ha ka yung bichaar u Judicial Magistrate 1st Class, Sohra Sub-Division ha ka 5 tarik uni u bnai.
Ha ka kyrwoh khubor na ki pulit da ong ha ka 21-05-25, u Raja Raghuvanshi deilang ka kurim u, ka Sonam Raguvanshi kiwa na Indore, Madhya Pradesh da wan ki cha Shillong kam chibynta wow lai Honeymoon heiwa da lai ki leh cha Sohra.
Ha ka 26-05-25 kini ki chi kurim da pyntip wa da wiar ki na Sohra wei da sdang wow thooh ki.
Hadien wa boon sngi wa da thooh ki da ki pulit ka Sohra, ki SOT, ki NDRF, ki SDRF deilang kiwa chong chnong ka thaaiñ, da chem yei metyap u Raja Raghuvanshi ha ka 02-06-25 na synrang ka Arliang Riat Kunongrim, Umblai hajan ka Wei Sawdong, Sohra.
Kamtæ da thung da ka Special Investigation Team (SIT) wa kynthup ya u Herbert Kharkongaor, SP (City), EKH, u Bipul Das, Dy. SP (Crime), u Simseng A Sangma, Dy. SP (Ops), u Kyrmen Shabong, Dy. SP (City) wa u SI. Anthony Khongsit uwa man kam u Investigating Officer wa ar ngut ki Sub-Inspector.
Hapoh 7 sngi wa pynman yei takit, da chemdien ya ki 5 ngut wa da suba emkti hei pynyap ya u Raja na Madhya Pradesh wa Uttar Pradesh.
Hadien wa pynlang ya ki sabut, da chem wa ka Sonam da yalang chan ko wa u Raj wei da sooh buit ki wow pynyap ya u Raja manda lai Honeymoon ki cha Sohra. Tangwa yei kaam pynyap da leh da u Aakash, u Vishal wa u Aanand deiwa sakhi ka Sonam ha Arliang Riat Kunongrim, Umblai hajan Wei Sawdong.
Hadien ini da kem leh ya le ngut kiwa kynthup ya u Lokendra Tomar, u Balla Ahirwar wa u Shilom James na Gwalior, Shadora wa na Dewas wa emkti ki wow pynwiar wei pynsih ya ki sabut. Ka Charge Sheet pyrchah ya kini daw e won hadien wa da yoh ya ka Forensic Report.
Discussion about this post