Hei miet ka 8 tarik uni u bnai heipor 9:30 da em i chah tympiah ki yit ki kari kiwa chong chnong ka Bataw ha kawi ka kynhun kiwa chong chnong ka Pynurkba wei katkam wa pyntip u waheh chnong ka Bataw da em leh i thmu pynyap ya kiwa chong chnong Bataw ha kitai ki bru.
Da ong u leh wa ini iwa jia toh dei wym poi pyrkhat wa da chim kabu da ki damok ya kiwa chong chnong ka Bataw kiwa wan emkaam na Shillong heiwa dapoi chei mynsoo joor uwi uwa chong chnong ka Bataw uwa tip kam u Sincerely Lyngdoh.
Da pyntip leh wa kini kiwa chim kabu da leh ki yeini deiwa pynemkaam da ka wait wa kiwi de ki tiar pynmynsoo heiwa da mynsoo joor u Sincerely Lyngdoh neibynta i khlieh neiwa chah pam u da ka wait wei da kit ya oo cha Bataw PHC yow yoh yei sumaar wa smat.
Ha ini i jia da tympiah leh ar tylli ki kari ki yong ki khon ka chnong Bataw kiwa em Number ML-11-3835 wa ML-04-8163 wei kiwa yahkhmat wow leh yeini da tip pyrtuid kam u Hame Bareh wa u Phas Rymbai, da pyntip u waheh chnong ka Bataw.
Chooh chooh da pyntip leh chwa ini, heipor 1:20 i sngi ka 8 tarik hi, da wan yahkhmat da u waheh chnong ka Pynurkba, u Syrdeplang Ryngkhlem wa u Secretary chnong, u Brightstar Rymbai wow kynroi wei pynchit ha i thaw wa tip kam i Lyngken Tariang (heipor wa dang mut kiwa chong chnong ka Bataw wow pynkhooid yeini i thaw) heiwa da mih leh i kyntien maham da uwi uwa chong chnong ka chnong Pynurkba, u Sokses Bareh wow pynyap ya ki khon ka chnong Bataw manda lai luti ki na u sarok PWD RBBJ Road wa man u luti wa lai lyngba ka chnong Pynurkba wei heiyatoh wa ini i chah maham da booh leh da ka ujor FIR ha Ladrymbai Police Outpost.
Mar ya tip yeini, ki pulit khlem da pynslem hapoh i yahkhmat u Superintendent of Police yong ka East Jaiñtia Hills District, u V. Kumar wa u In-charge ka Ladrymbai Police Outpost, u SI. R.E.M. Umlong da wan hiar ki cha ka taaiñ kamjooh da lai pait ki ya u khynroo wa mynsoo ha Bataw PHC.
Ya kani ka FIR da booh neibhah da em kiwa chong chnong kiwa da tieñ manda sñiaw ki yei kyntien maham utai u bru, wei neiliang u waheh chnong ka Bataw da ong u wa toh u kem ya kini ki bru wa da tipmit wei kamjooh ya kiwi de kiwa emkti heini i kaam wei wow pynchitom ki.
Discussion about this post