U District Commissioner ka Morigaon, Assam da phah pynche u ya u Dr. Kantheswar Bordoloi (Gynaecologist), Senior Medical & Health Officer ha S.T.H.G. Civil Hospital hadien wa sumaar pynkha khon u 21 sien da ka Lower Segment Caesarean Section (LSCS) hapoh 10 kynta.
Katkam ka Show Cause Notice wa da phah cha uni u Doctor, da leh u yei pooid pynkha khon hapyrdi 3:40 i sngi ka 5 tarik hadooh 1:50 i step synyaaw ka 6 tarik ha Major Operation Theatre kani ka Hospital.
Ini i sumaar u Doctor ya 21 ngut du hapoh 10 kynta da wanrah i yei sñiawkhia yei man chngaaiñ wei lada bood ya ki kyndon sumaar bru.
Da phah ya ki bor Hospital wow e ya ka Report heiyatoh wa ini nadooh i pynkhreh, i pynkhooid ya ki tiar, i em kiwa kreh ki Nurse wa kiwi kiwi.
Ha ka Notice u DC da phah leh ya kiwa pynlai ya ka Hospital wow e ka Report wa bniah kammoh ki kyndon wa da booh hawa pynman yei pooid, kammon toh u pynkhooid yei thaw pooid, katwon ngut kiwa kreh toh u em wei kammon da chah wow pooid kat deini sien sang heipor wa tbian.
U DC da ong u leh wa heipor wa lai pait lai sylli u ya ka Hospital da chem yeiwa duna nadooh ki tiar sumaar, i thoh i taar, wa kiwi iwa da pynphylla ya oo lada bood ya ki kyndon wa da booh.
Da phah leh ya u Dr. Bordoloi wow pynche wei batai bniah u yeini hapoh le sngi.
Uni u Doctor da ong u wa ini i jait pooid ymtoh iwa eh u leh iwa chimpor 25 minit tangwa ha iwa rap suk i kha khon ye u chimpor du 15 minit donhi wei hapoh kani ka thaw pooid da em ar tylli ki thaw pynpooid iwa da pynsuk neibhah ye wow pynkhooid ya kawi katwa dang pyemkaam ya kawi.
Da ong u leh wa na waroh kiwa chah sumaar da man ki kiwa chait wei da liwan ki katwa ar ngut dang em ki hapoh Hospital wei kawi won da phah cha Gauhati Medical College & Hospital.
Discussion about this post