Ka MLA yong ka All India Trinamool Congress (AITC), ka Miani D Shira da pynsñiaw ko yei sñiawkhia hapoh ka yung dorbar chna aiñ ka ka jylla hajrong i roi ki kaam khayi yei doh i pran (Prostitution) khlem da sarom ha ka thaaiñ Khyndailad kawa tip leh kam ka Police Bazar kawa man leh kam ka yaaw wa heh wa bna naam ka nongbah Shillong.
Kani ka mat wa yatoh wa ki kaam dai yei doh i pran da ieh kamtu khlem da em wa nood wow yaklam iyi iyi wot da ki bor wa toh u pait yeini, iwa da pynman ya ka MLA na Ampati wow klam bait plak hapoh ka yung dorbar chna aiñ.
Ka Miani da pynsñiaw ko yeini ha ka yatai Special Motion hajrong i drug wa u khñiang HIV, heiwa da ong ko wa i boon kiwa yoh HIV man ko leh neidaw wa roi kiwa dai yei doh i pran ha Shillong.
Ka MLA ka Liang Pyrchah da ong ko wa ha ki 30 snem wa da lai kam kawa chong chnong ha Shillong, ym pu jooh yoo ko kamni ha ki por wa da lai deiwa ong wa lada lai ko cha ki thaaiñ Khyndailad, IGP wa marjan ka yung krehkaam u SP wei lada lai lyngba ka yung u Lat da yoo ya kiyi kiyi ki wym jooh oo nachwa.
Hawa pynsñiaw yeini ini wa da jia iwa da yang chwa i maa, da kyntu ya ka sorkar jylla wa ya ka chnat pulit wow leh smat deiwa ya phyllulang leh wa kiwa yahkhmat niam, ki seiñ kreh mon sñiawbha wa kiwa yahkhmat chnong wow kdoh u khoom ya kini ki kaam wa sih.
Najrong ini, ka Miani da e buit ko leh ya ka sorkar wow booh yei thaw Test HIV ha waroh ki PHC wei kamjooh ki thaw yasyllok wei e dawai ya kiwa suk wow yoh ya uni u khñiang.
Hawa yatoh wa i drugs, ka MLA da maham ko deiwa eh yei poor smat i pynemkaam yei drugs hadooh ki thaaiñ plalatsor, deiwa ong wa kamwa 10% na kiwa chong chnong ka jylla da ngop ki hei kyrni drugs, deiwa ban joor wa emkaam smat ya ki thaw sumaar wa ki thaw pynkhooid yei drugs.
Discussion about this post