Ha ka lympung yalehke Badminton wa nyngkong dooh neibynta kiwa da heh rta ha Jowai, kawa tip kam ka Open to All Master (Veteran) Badminton Championship 2025 wa pynlai da ka West Jaiñtia District Badminton Association ha Seiñraij Indoor Hall wa em ha Tpep-Pale neibynta ar sngi kawa da sdang ynne ka 12 tarik wei daw kut won mynstep ka 13 tarik, da wan wow chimbynta hadooh 50 tylli ki Team kiwa man ki bru waheh wa maya ya kani ka yalehke wa kynthup na kylleiñ ki District ka jylla Meghalaya wei em leh kiwa wan na ka jylla Assam.
Neiliang, u D. Pyrbot, President ka West Jaiñtia District Badminton Association, ong u wa dap ki dei sñiawkmen wa khroo wa ha kani ka kynti da ye ki wow pynman kam ya kani ka lympung kawa da yooluti ki nadooh ki snem wa chadien wei kyrmen ki leh u man ko kawa pynsñiawsuk ya waroh kiwa wan chimbynta.
Hei yaklam wa ki bru waheh wa wan na Assam kam u Sanjoy Majumder wa kiwa won na kiwi ki District ka jylla wow lehke ha kani ka lympung, da pynsñiaw ki yei kmen wow yoh kam kani ka rynsan yakob wa da pynman kyrpang neibynta yong ki, najrong wa khana ki leh yei lai luti yong ki ha kani ka jait yalehke.
Neiliang u Mosklandar Marngar uwa na West Khasi Hills ong u, i pynman kam kani ka lympung neibynta kiwa da heh rta man i iwa emkaam bha neibynta i chongsuk najrong wa i nang heh rta ye ko u wanrah yei kjut wa boon jait.
Ong haroh u wym em dawai palat nei pynkhih pynksaaid yei doh i pran, tangwa boon ki bru hadooh wa yoh yei kjut chitom tæ sdang ki wow leh Exercise wei ini boonsien ym rap em yumut de ki.
Heijooh i por ong u wa i chimbynta kiwa da heh rta ha kam kani ka yalehke yarap e mynsien haroh ko ya ki khon khynroo khyllood ka pateiñ wow yalehke neibhah ha ka District wa em u, ki bru waheh pna ki hi wa yaleh u pyntoh pynbiang yeiwa emkaam ha ki Indoor Hall næ ki thaw yahlehke khnang wa ki khon khynroo khyllood u yoh pynpliah ki.
Discussion about this post