Wow yoh i bha i miat pyndep ka Raij Mynsoo ya ka lehniam Behdieñkhlam

Kam chibynta wow yoh ki khon ki rayot ka Raij ka chnong yei chongsuk chongsaiñ, i miat i bha, i roi i paar liang wanang wa u bha u khoo u kba. Ha ka 16 tarik ka Raij Mynso da pyndep ko ya ka lehniam Behdieñkhlam 2025.

Kani toh kawi na ki rukom lehniam wa da leh da pyndep chisien chisnem hapoh ka Raij Mynsoo da ki khon ka Ñiamtre.

Ha uni u snem ya kani ka lehniam næ ka kñia e ngooh da leh da pyndep ha ki le sngi iwa man nadooh ka 13 tarik da ki kñia ki khriam wei da pyndep ya ka ha ka 16 tarik.

Chwa u sdang ka lehniam da em ka yalang wa tbian heiwa u Dolloi ka Elaka Jowai, u Puramon Kynjing da man u kam u kongsan katwa u Iukles Dkhar kam u symbood kongsan hei emlang kiwa chakri niam ka Raij Mynso wa kiwi kiwi.

Ya ka yalang da pynlai da u K. Myrshiang, Dolloi ka Elaka Mynso wei da yoh yei Ngoohblai na u Pator, u K. Situng, ki kyntien klamphang na u P.M. Chen, Secretary ka Seiñraij Mynso wa na u Deibha Rymbai uwa man u Secretary ka Niamtre Committee ka Seiñraij Jowai katwa ya ki kyntien khublei da yoh na u H.B. War uwa man u President ka Seiñraij Mynso.

U P.M. Chen da batai u wa ya kani ka lehniam da sdang nadooh ka 13 tarik uni u bnai wei da tipmit ya ka Behdieñkhlam ka Raij Mynso nadooh u 1995 da ka JHADC.

Da ong u wa chwa wow hiar thung ya u kba da pyndep ya ka Chaad Tyllu wei chwa wow hiar ah ya u kba da pyndep ya kani ka Behdieñkhlam.

U Iukles Dkhar da e khublei Behdieñkhlam u ya ki khon ka Raij Mynso heiwa da ong u wa ka JHADC da yaleh ko wow pynjanai ya ka niam ka rukom katkam ka Sixth Schedule ka Constitution ka ri.

Neiliang u Puramon Kynjing hawa e i klam da ong u wa u Blai maya bha u ya ki bru deiwa booh ya ki niam ki rukom jar jiar katkam ki Elaka, ki Raij ki chnong wa ki kur.

Da ong u wa sñiawsuk wa i yahluti ki Blai ya ki Ma ki Woh nadooh nachwa hadooh wa poi ynne ka sngi wa yoh yei roi i paar.

Chooh chooh da ong u wa emkaam u em i yatoh para bru khnang wow yoh yei kyrkhu u Blai na wym yoh u yoo.

Hadien ka yalang da pyndep ya ka lehniam ha Yung Langdoh da u Langdoh, u Pator wa kiwi kiwa da chim ki wow pynchong pynthiah ya ka lehniam hapyrdi ka pliang ka naar wa uwa suit wa choor iwa man katkam ka rukom wa pynjooh da sikai ki waheh na warim.

Manda kut ka lehniam na Yung Langdoh, ki khon ka Niamtre hapyrdi i rah ya ki Sakymphui da mih ki na yung Langdoh deiwa rah ya u Sñiang Kñia tymbud luti hadooh wapoi ka thaw lehniam wa tip kam ka Madan Myrleiñ.