Hadien ka takit wa bniah hajrong iwa wiar wei chah pynyap ka Insaphira Lyngdoh Mawnai kawa dang 4 snem i rta ha Nongrah Nonglum Brei, ki pulit da ye ki wow chem yeiwa sakhiat wei katkam wa pyntip u Superintendent of Police ka East Khasi Hills, u Vivek Syiem, da ong u wa uwa leh yeini i kaam toh u khynnah wa dang 13 snem, uwa sah marjan yung wei uwa jooh lai leh cha yung kani ka khynnah wei uwa kam leh wa yoo u ya kawi ka Scorpio rong yong heipor wa wiar ko deiwa ong leh em ki bru wa sap Mask du wow yahbakla ya ki pulit.
U SP da khana u wa uni u khynnah da phla u wa da rah u ya ka Insaphira najrong kynroh wei da lai yah u ka cha ka thaw wa dang chna yung deiwa lai na luti ktieh, iwa man leh i thaw wa chem yei metyap, heiwa utai u khynnah da ong u wa manda poi ha kani ka thaw neidaw wa ktieh ki kjat u da sait u ki ha ka um wa em ha kani ka thaw heiwa da tlær u wei da toh taanlang u ya kani ka khynnah chapoh um wei kani ka khynnah da yap ko deiwa kdang um wei deiwa tieñ da ban u da u moo hajrong kani ka khynnah wei liwan u cha yung.
U SP da khana u leh wa da chem ki dak kha ha kjat uni u khynnah neiwa oor u ha itai i thaw iwa pynyoo wa tlær sakhiat u wei da lai rah ya uni u khynnah cha Juvenile Home wei daw bichaar da ka Juvenile Justice Board.
Katkam wa ong u SP, ka Post-Mortem Report leh pynyoo ko wa yap kani ka khynnah nei ngam um wei ym em dak næ ki kha hei doh i pran ko kamjooh ym em leh ki dak wa chah slaitbor ko.
Da pyntip leh wa uni u khynnah hadien wa jia ini da wan u cha yung kani ka khynnah wa ka bei u wei oo leh da emlang u heipor wa thooh ya kani ka khynnah.
Neiliang u SP da ong u wa kani ka thaw heipor wa jia rap dap um bha ko wei ka takit dang lai ko yow tip lada em iwon iwon i thmu chwa uni u khynah.
Discussion about this post