Ka seiñ Jaintia Students’ Movement (JSM) Education Cell-Central Body kamwa jooh leh man-u-snem da pynman biang ko yei e khusnaam kawa tip kam ka 7th Academic Excellence Award 2025, neibynta ki khynnah puræ kiwa na Ri Jaiñtia ya kiwa yoh 80% chaneiñ ha ka SSLC, HSSLC wa ka Graduation. Kamjooh da e leh da ka Exceptional Award cha kiwa pyndep ya ka kyrdan Ph.D, ya kiwa wanrah naam rah burom ya ka Ri Jaiñtia deiwa jop ha kiwon kiwon ki jait yalehke wa da pynman ha ka State wa National Level wei wa ha uni u snem da em ki wa yoh Award haduh 203 ngut.
Ya kani ka yalang da e khusnaam da pynman ha ka 20 tarik uni bnai ha Auditorium ka District Library wa em ha Mynthong, Jowai heiwa U SP ka WJH, u Jagpal Singh Dhanoa da man u kam u kongsan, u SP ka EJH, u Vikash Kumar kam u symbood kongsan deilang u Jason Myrom, Additional SP ka WJH kam u Special Guest wa kiwi kiwi kiwa chah khut sñiawbha.
U kongsan hei klam da e mynsien u ya kiwa yoh khusnaam deiwa ong wa kam ki khynnah puræ ha ka juk wa katni emkaam ki yei nang i stat ryngkat i tip ya ka luti kawa chaphrang, deiwa pynemkaam hok yei stat ki, wei wow pynemkaam ya ka ha ki rukom wa boonjait kawa ye u yarap wow pyntyrchaaiñ hawa lai luti ki chakhmat lyngba i kreh chitom wei deiwa minot ha ka puræ puthi.
U symbood kongsan hei klam da pynsñiaw u wa i stat i tip ym em thaw kut ko, wei kam kiwa yoh Award emkaam u em ki ya ka thong hawa im deiwa yaleh chitom u khreh ki kot kiwa boon jait ki wow yarap ya ki u poi cha ka thong yoh u ye phi u chakri ya ka imlang sahlang.
Chooh chooh da yoh yei kyntien e mynsien dei klam na u Jason Myrom, na u President Rangbah ka JSM, u Leningstar Rymbai, i pynsñiaw ya ka thong ka seiñ na u Roitre Dkhar, General Secretary Central Body ryngkat wa i klam neiliang kiwa yoh khusnaam, ka Wympherhanlada Rymbai, ka Mayalang I Dkhar wa neiliang ki bei ki pa yong kiwa yoh khusnaam da klam da ka Liza Eva Melamon Myrboh.
Ha kani ka sngi e da ki Memento cha kiwa yoh Award wei dei wa pynkupburom leh ya ki dkhot ka seiñ kiwa e snaam sñiawbha wa da ka Bravery Award cha kiwa yahkhmat seiñ.
Ya kani ka yalang da pynlai da u Arwankijuh Dkhar deiwa sdang dei duwai na u J. Kharmuti, Working President wei da pynbood dei kyntien pdiang burom na u WRD Siangshai, Education Secretary CB wa ki kyntien sñiawngooh na u Heihokmi Supuh, President JSM Western Region.
Discussion about this post