Ha ka sngi Graduation Day næ ka sngi pynkup burom ka Kiang Nangbah Government College, Jowai ya ki khynroo khyllood puræ yong ka kiwa da pyndep yei puræ Graduation wa da pynman ynne ka sngi ha Auditorium ka College, da pynkup burom ko leh ya kiwa puræ yong ka kiwa yoh ksoh yei kyrdan wa chakhmat, da pynlait paidbah leh ya ka College Uniform, wei da e burom haroh ya kiwa yahkhmat Student’s Union ka College.
Ha kani ka Graduation Day da wan emlang u MP ka Rajya Sabha, u Dr.Wanweiroi Kharlukhi kam u kongsan, u H.M. Shangpliang uwa e buit ha ka chnat puræ puthi ka sorkar jylla kam u symbood kongsan chirup i emlang ka Dr. L.M. Darnei, Principal ka Kiang Nangbah Govt. College kiwa sikai kiwa lai puræ wa kiwi de.
U Dr. Wanweiroi kam uwa jooh yahkhmat ya kiwa lai puræ, da pynkynmoo u yei lai luti heipor wa puræ u ha kani ka College wei man u leh kam uwa yahkhmat ka Student’s Union.
Deiwa pynrap leh wa toh lyngba i chimkhia yong oo wow krehkaam kam uwa yahkhmat ka Student’s Union ha ki por nachwa wei deiwa kyrchaan ki paidbah ka Ri-loom Jaiñtia tæ poi u cha kani ka kyrdan wa katni kam u MP ka Rajya Sabha.
Ong haroh u em chiboon ki bru wa stat wa chemphang wa kani ka College da pynmih ko, wei daw pynmih chooh chooh ko neibynta i emkaam ka District lada toh ha ki kyrdan waheh yong ki chnat krehkaam sorkar, ha ki kaam saiñ hima sima najrong kiwi ki bynta.
Kamtæ da e mynsiem haroh u ya ki khon khynroo khyllood wa emlang ha kani ka sngi wow kreh chitom ki neibynta i burom ka Ri-loom Jaiñtia neibhah hadooh kamwa man katni wa da palat 50 snem i yoh jylla leh, ym pu em uwi wot leh na Ri-loom Jaiñtia wa yoh man Chief Minister ha ka jylla.
Kamtæ ban joor u ya ki khon khynroo wow chim ki ya kani ka laad, neibhah oo leh heiwa sdang man u kam ki hi ki khynnah skur.
Da pynrap haroh u wa i Pass na kani ka College ym mut wa da kut i lai luti, tangwa man i sdang wow lai chakhmat, kamtæ toh u booh ya ka thong wow lai chakhmat dei thmu wa bha khlem e laad yei dooh kyrmen wow wan hei rukom pyrkhat.
Neiliang u H.M. Shangpliang khana u wa ka sorkar hapoh i yahkhmat u Conrad Sangma da yaleh ko chiboon kiyi kiyi neibynta ki khon khynroo khyllood deiwa wai ki laad waphær waphær ha jar jiar i sap kamwa u Blai da booh u.
Kyntu u wow yakrehlang chirup chirup wa ka sorkar wei wow chim kabu ya ki laad wa wanrah ka sorkar.
Neitæ wow em leh i thrang hei pyrkhat iyi wa toh u leh neibynta ka jylla, wei i jubab u wan i lyngba i duwai neibhah em chiboon kiyi kiyi wa ye u leh.
Discussion about this post