Ka sorkar jylla kamwa dadep klam ha ki kajiak snem wa dep, da pynskem biang wow ong wym chah yei tih Uranium wei ym ye ka sorkar India wow leh katwa ngait wei yei tih Uranium dadep pynkut hapoh ka jylla Meghalaya.
Kam wow kdaw heini wa ka sorkar India lyngba ka Ministry of Environment, Forest and Climate Change, ha ka 8 tarik uni u bnai da pynmih ko ya ka Office Memorandum (OM) wym pynman de ya ka Public Hearing lada emkaam wow tih ya ki Atomic Minerals kam ya u Uranium.
Hawa klam chaphang ini, u Symbood Montri Rangbah wa pait leh ya ka chnat Kaam Pohyung, u Prestone Tynsong da ong u wa ka sorkar da klam che ko hajrong kani ka Office Memorandum wym chah u tih Uranium hapoh ka jylla, khamtam wa man ko kam ka Sixth Schedule heiwa da mantre yei thaw da ka District Council, ki bru samen, ki kur, ki Elaka, ki Raij wa kiwi de wei ym ye wow tih Uranium khlem da yoh mynjur da ki tre thaw wa ka District Council.
Da ong u leh wa ki paidbah ymtoh u tieñ ki ya kani ka OM neibhah wot ka Supreme Court ha u snem 2019 da pynskem ko wa ha Meghalaya yei khyndaw, ki thaw ki bhaw wa ki mar toh kiwa mantre da kiwa chong chnong wa ka District Council, deiwa pynrap wa ka sorkar jylla ym chah ko wow pynkrehkaam ya kani ka Office Memorandum wa da pynbna da ka Ministry.
Hawa kylli hajrong ki kyndon kiwa e bor ya ka sorkar India wa ye ko wow tih ya ki marpohkhyndaw Atomic Minerals lada emkaam, u Prestone da ong u kam itæ ym em tangwa ki thaw wa haap hapoh ka Sixth Schedule ym em sorkar India, ym em kyndon wei ym em aiñ kawa ye wow pynbor.
Da pynyknmoo wa da klam che nachwa wa hapoh Meghalaya ki kaam wa yatoh wa i tih Uranium da pynkut hapoh ka jylla, neibhah wa ki tre thaw ym kwah ki wow e wei ka sorkar jylla leh da mynjurlang ko yeini wym ye neibhah wym toh i thaw ka sorkar.
Hawa kylli chooh chooh, u Prestone da ong u wa ya ini i kaam daw yaklam hapoh ka Cabinet wei lada emkaam daw thoh pynkynmoo biang ya ka sorkar India wym ye u tih ya u Uranium.
Discussion about this post