Ka Final yong ka Asia Cup ha Dubai ynnin i miet da pynsñiawsih ko ya kiwa boon ha Pakistan hadien wa rem ko ha ka India heiwa ha kani ka lympung da rem ko la le sien ha ki le tayaaw.
Hadien ka yalehke hawa saam ya ki Prize, u Captain ka Pakistan, u Salman Ali Agha da yoo wa man u uwa da sñiawsih kthang hadien wa da chah pynrem ka liang yong oo.
U Salman da ong u wa man iwa eh bha neibhah wym ye ki u tied boon Run katwa hawa bol da man ki kiwa chkæh. Da ong u wa lada heipor wa Bat ye ki u tied boon Run daw man ka yalehke mar dei kangtleiñ.
Heipor wa saam Prize, ki paidbah ha Stadium wa kiwa pait ha TV da man kiwa khyrngiat hadien wa yo yei sñiawsih wei chrai u Salman neibhah wa mar lai chim u ya ka Cheque wa rem ki da noh wot u ya ka.
Neiliang ka India won ym em lai pdiang ki ya ka Trophy wa ki Takma neibhah wa da e ya ki da u Moshin Naqvi uwa na Pakistan uwa man leh u Chairman ka Pakistan Cricket Board wa kam u Interior Minister ka Pakistan.
Da yoo leh wa kiwa yalehke ka India da lehkmen ki khlem ka Trophy ha kti neidaw i kynaad hapyrdi ki ar ri.
Discussion about this post