Jowai : Ka seiñ KJNU da pyntip ko wa katkam i chem yong ka, wa ha East Jaiñtia Hills District hadooh 598 ngut ki khynnah skur kiwa haap hapoh ka Khliehriat Block wa 318 ngut ki kynnah skur na Saipung Block da haap pep skur ki neidaw wa ki bei ki pa yong ki ym yoh laad ki u kamai nadooh wa khang ka National Green Tribunal (NGT) wow tih kamjooh wow chalan mooyong hapoh ka jylla.
Da ong ka seiñ leh wa nadooh u snem 2014 ki skur wa da khang kynthup ya ka Little Star English School, Sohkynphor (2014), ka Pynthor Salahe West, Tuber Kmai, Arpan English School Lad Rymbai (2015), Virtue Art Academic Ladrymbai (2016), St.Paul Musniang (2015) toh kiwa em hapoh ka Khliehriat Block.
Ki skur kiwa hap hapoh ka Saipung Block won da em hadooh 6 tylli kiwa kynthup ya ka La-i-Jong Memorial LP School, Narwan Promising English School, Pala, Ocean Heat English School Saipung, Embok Memorial English School Shnong Rim, New Burden LPS Tangnub wa ka Jalaphet Pyllun LPS Jalaphet.
Hei yatoh wa kitai ki khynnah skur wa ka mynried yong ki, ki yi wow bahkhlieh wei neiwon u yoh poisa biang ki u lai puræ neibhah ha ka pyrthai katni lada ym biang i puræ puthi ym poi cheiwon cheiwon. Da kyntu ya ki MP, MLA, MDC wow sñiawbha u noh kyllooid ki cha kini ki khynnah lyngba ki scheme yong ki lada em i sñiaw para jait bru.
Ka seiñ leh da kyntu ko ya ka JHADC wow pynemkaam ko ya ki bor yong ka wa pynkup bor katkam ka Sixth Schedule yow pynwiar noh ya i chitom wa wanrah ka NGT yow yoh i u mantre ya ki khyndaw ki chyiap kamwa jooh man nachwa.
Da pynkut deiwa ong wow pynkrehkaam noh ya ka Mining Policy yow yoh kreh ki paidbah chwa wow der i por wei ym toh u pynbiej bru ha ka por Election.
Discussion about this post