Chongkun ka Durga Puja ha i Mandir wa rim tam ha Meghalaya

Ka lehniam Durga Puja yong kiwa ngait niam Hindu da pynman ya ka ha kylleiñ ka ri ka pyrthai wa kamjooh leh ha Durga Mandir wa em ha Nartiang, West Jaiñtia Hills kawa tip kam ka Maa Jayantee Temple.

Kani ka Mandir man ko kawa rim tam ha Meghalaya ya kawa da chna ha ki spah snem nachwa nadooh ki por ki Syiem ka Hima Jaiñtia.

Katkam i ngait Hindu, kani ka Mandir man ko kawi na ki 51 tylli ki Shakta Pithas namo ki thaw Kyntang ha kylleiñ ka ri India wa ki ri wa yajan wa ka.

Ha kani ka Mandir ya ka Durga Puja ym em leh kamwa leh chawi tawon heiwa da pynwandur ya ka Blai da ka Pachor wei da pynsem ya ka da ka sari, da ong u Oni Deshmukh uwa man u Pandit kani ka thaw.

Kiwa ngait niam Hindu na kylleiñ ka jylla da wan sakhi wei da wan mane ki ha kani ka Mandir heipor Durga Puja.

Hawa yaklam wa u Waheh Chnong ka Nartiang, u C. Myria da ong u wa i kaamram ka chnong toh wow pyntikna wa em i chongsuk wei i kaam niam da pait da u Dolloi ka Elaka.

Neiliang u Prof. (Dr.) Vijay Kumar Dwivedi, Director I/c NEIAH College, Shillong uwa wan sakhi ya kani ka lehniam da ong u wa da em chiboon i kylla ha kani ka Mandir na ki snem wa da lai wei da yaroh u ya ka sorkar wa da wanrah ko ya ki kaam pynroi ha ka nadooh ki thaw chong wa ki thaw pynyieñ kari.

U Puja Coordinator ka Central Puja Committee, Shillong, u Dipak Singha Roy da ong u wa kani ka Mandir man ko kawa kyntang bha heiwa man ko kawi na ki 51 tylli ki Shakta Pithas wei i rukom lehniam heini man i iwa phær bha.

Ha kani ka sngi hapoh Mandir da sakhi ya ki manpa wa rwai wei choh ksiñ wa chæng chæng katwa kiwa ngait niam da wan e Prasad ki wei da yieñ ki da phaw ngut wa yang ya ka pali yong ki wow psiah hapoh yow ngooh Blai.

U Dolloi ka Elaka Nartiang, u Salong Lamare da ong u wa i kaam yong oo toh wow pyntikna wa lai bait ka niam wei wow pait yei wan e ya ki blang wa ki rapati ha kani ka sngi.

Ya i pynngam um ya ka Blai daw leh ya ka mynstep ka 2 tarik.