U Montri ka chnat Agriculture and Farmers’ Welfare uwa man leh u MLA ka Resubelpara, u Timothy D Shira da ong u wa i wan ka rel wa kit mar ha Mendipathar da wanrah ko chiboon i myntoi ya ki warep ka Meghalaya khamtam kiwa na ri-loom Garo heiwa da ye ki wow dai yei mar ki hei dor wa biang wei ym em de sah kiwa khlem ye u dai.
U Montri da e nongmuna u ya u sachram uwa dai hadooh ₹400 chi kilo ha Jail Road, Shillong tangwa da chongdur du ₹10 chi kilo ha ri-loom Garo. Wei deiwa em ka luti rel, kini ki mar da ye ki wow lai sak cha Guwahati deiwa ye u dai ki hei dor wa yoh nong bha. Da khana u leh yei em kawi ka kynthai kawa dai ya u sachram hei dor wa ₹20 chi kilo ha Guwahati wei du hapoh chi kynta da ye ko wow dai lut.
Da ong u leh wa ki warep da chem ki ya ki yaaw ki haat wow dai ladaw wa u sachram khlem da dooh nong wei deiwa em ka luti rel da pynduna yeiwa hap u noh ya ki mar kiwa sah khlem dai.
Heiyatoh won wa i wan kiwa na baar lyngba ka luti rel, da ong u wa kiwa wan ha Mendipathar toh yow thied donhi ya ki mar wei ym em sah ki neidaw wym yoh ki u thied thaw deiwa pynrap wa ka West Garo Hills rap khuslai hi neibhah wym em chimkhia ki tre thaw iwa ye wow yah chei wan chong chnong kiwa na baar kat dang lai i por.
Da kular u leh wa ka sorkar dang yaklam ko wa ki sahep ka chnat Agriculture yow thooh kiwi de ki yaaw ki haat wa ye ki warep u pynpoi ya ki mar rep ki.
Chiboon ye dai ki warep ka Garo deiwa em ka rel kit mar ha Mendipathar, ong u Montri ka chnat Agriculture
© 2025 WYRTA Khubor Hei Ktien Pnar
Discussion about this post