Ka Loompyrdi Iongpiah Dorbar Chnong ha ka sngi 5 tarik uni u bnai da pynman ko ka yachemlang wa kypang ki khon u loom u pdeiñ ha Yungwalieh heiwa kani ka sngi daman ko kawa yoo phooh yoo phieñ deiw wan yachimbynta nadooh ki khynnah hadooh ki waheh wasian wa ki manbei manpa.
Ha ka yalang wa pynlai da u khynroo Kwelly Challam wa ka khyllood Iwakani Challam, u waheh Pynsakhiat Ieini Kyndiah, Kni ka Loompyrdi Iongpiah da siang da booh u i ngoohblai ngoohsyiem neitæ u R.L. Bimee Suwer, Waheh Chnong ka Loompyrdi Iongpiah e u ki kyntien yahkhmat hajrong ka thong yong kani ka sngi wa ong “Kob Yei Nam” wei chooh chooh da yoh leh i klam na ka P. Shullai kawa man kawi na ki manbei wa da yoh yeini i pynkup burom neitæ ki kyntien e mynsien won ya ki khon khynroo khyllood na ka Synchar Pyrbot kawi na ki khyllood wa da yoh yei pynkup burom ha kani ka sngi kamjooh leh ki kyntien na u Marbun Laloo uwi na kiwa thoh drama chutia danda ka Loompyrdi Iongpiah.
U R.L. Bimee Suwer hei klam yong oo, da ong wa i thmu yong kani ka Yachemlang toh wow wanrah itæ i yajooh yajan wei ya maya saia hapyrdi ki khon u loom u pdeiñ ha ka luti ka yurim wow tyoor tule ya ka pateiñ du deiwa miat wa bha.
Wow pynsahkynmoo chooh chooh ya kani ka sngi da pyntasbahlang leh da i pynkup burom wa kyrpang ya ki 16 ngut ki manbei manpa kiwa da kynjoh 70 snem i rta, i pynkup burom leh ya ki 4 ngut kiwa thoh drama heipor Bamphalar wa i pynkup burom leh ya ki 14 ngut ki khon khynroo khyllood kiwa da yoh 60% chaneiñ ha ka SSLC Examination, 13 ngut kiwa lehbha ha ka HSSLC Exam wa 6 ngut kiwa da pyndep ya ka Graduation wa 7 ngut won kiwa da pyndep ya ka Post Graduation.
U Pearlet Toi hei klam kam uwi na ki waheh wasian ka Loompyrdi Iongpiah da ong u nujor i man yong i Yungwalieh ha ki por nachwa wei por katni daphær i bak la bak, kani pynyoo ko ka dak ka chin wa ka dorbor chnong kaap lai ko chakhmat katkam i yah ka juk ka por ha waroh ki liang. Iwa kyrpang chooh leh da e mynsien, kitbok kitrwiang u ya waroh kiwa da pynkup burom.
Ka Dorbar Chnong Loompyrdi Iongpiah dei sñiawsarong ha kani ka sngi da pynkupburom ko leh ya ka Dr. Wakani Toi ka khon yong ka Best Toi wa u tynrawde u Arun Lanong wa man kawi na ki khon ka dorbar chnong kawa da pyndep yei kyrdan MBBS wei kamjooh leh neibynta i burom u tynrawde u Waheh K.F. Laloo da e kti ya ka muhor sahnaam cha kiwa ha-yung ha-sem yong oo.
Ya kani ka sngi da pynphooh pynphieñ wei pynka-it kasar leh ya kiwa wan sakhi da ki rwai ki chaad wa da chimbynta da ki manbei, ki khon khynroo khyllood wa ki khynnah skur ka Loompyrdi Iongpiah wei hei pynkut u Wansalan E Dhar, General Secretary Loompyrdi Iongpiah da e u ki kyntien khublei.
Discussion about this post