Ka Jowai Diocese Catholic Youth Movement (JDCYM) da pynman ko ya ka 14th Annual Sports Meet ha Holy Spirit Parish Ummulong ha ka 3 wa 4 tarik uni u bnai heiwa da wan chimbynta da ki 18 tylli ki Parish wa ka Shillong Unit.
Ha ka sngi sdang ya ka Sports da yoh yei duwai na u Fr. Polycarpus Shylla, Parish Priest kamjooh u Spiritual Youth Director ka Ummulong Parish wei pynbood dei kyntien Pdiangburom na u President, u Wellson Siangshai.
Ya kani ka Annual Sports Meet 2025 da wan wai pyrda da u Eddy Shylla heithaw u Sniawbhalang Dhar, Dy. CM kam u kongsan, deiwa wan leh u Lieh Sungoh kam u symbood kongsan deilang wa ki Phadar, ki Sister kiwa kitkaam ka JDCYM, kiwa chah khut sñiawbha chirup wa ki khynroo khyllood yong ki 18 tylli ki Parish wa Shillong Unit.
Ha kani ka Sports Meet da em boonjait ki yalehke nadooh ki Race, Football, Basketball, Debate, Arm Wrestling, Long Jump, High Jump wa Marathon.
Hei miet sdang ha ka sngi Thohdieñ da em ka Night Show Program dei wa pynman ya ka Debate Competition hajrong ka ‘Mixed Marriage’ wei da em leh ka yaleh Arm Wrestling heiwa da wan sakhi da u Deimutang Kaiman Muksor, Assistant Executive Engineer Sohiong Sub-Division MeECL kam u kongsan katwa u Rimiki Dkhar, Assistant In-charge, Ummulong Police Beat House kam u symbood kongsan. Ha ka Debate Competition da jop da ka Pionky Chyrmang na Shillong Unit, ka Rimika Sukhlain na Sutnga Parish hei wa ar katwa u Wansalan Lyngdoh na Mawkyndeng Parish hei wa le. Ha ka Arm Wrestling yong ki chynrang da jop da u Lasulang Rymbai na Ummulong Parish katwa neiliang ki kynthai da jop da ka Olivia Dkhar na Jalaphet Parish.
Hei step yong ka 4 tarik da pynman ya ka Marathon Race kawa 8 Km heiwa u Langmi Bamon uwa man kam u General Secretary ka Ummulong Sports Social & Cultural Club da man u kam u kongsan. Ha kani ka Marathon Race neiliang ki chynrang da yoh nyngkong da u Daniel Tyngkan na Mawkyndeng Parish, hei wa ar won da yoh da u Arkeo Dkhar na Jowai Parish wa u Fernando Nongrum na Amlarem Parish hei wa le.
Neiliang ki kynthai da jop nyngkong da ka Kyrsoilang Phawa na Iongshiwiat Parish, ka Sawaphidaroi Sungoh na Barato Parish hei wa ar katwa ka Merida Lathong na Sahsniang Parish hei wa le.
Ha ka yakhun Final yong ka Football, ka Ummulong Parish da jop ko pyrchah ya ka Barato Parish, katwa ha ka Basketball yong ki chynrang da jop da ka Cathedral Parish Jowai pyrchah ya ka Shillong Unit wei yong ki kynthai da jop da ka Shillong Unit pyrchah ya ka Khliehriat Parish.
Yei naam Best Athlete neiliang ki chynrang da yoh da u Eiladmi Synnah na Mawkyndeng Parish katwa neiliang ki kynthai da yoh da ka Dawanbiangki Khyriem na Amlarem Parish.
Na waroh ki Parish waphær waphær kiwa chimbynta, ka Parish Ummulong da rah ko yei naam Champion ha kani ka Sports Meet 2025, katwa ka Parish Barato hei kyrdan wa ar, ka Cathedral Parish Jowai hei kyrdan wa le wei yei naam Best Discipline da yoh da ka Iongshiwiat Parish.
Ya kani ka Sports Meet da wan wow pynkut wei u pynhaap ya ka lama ka seiñ da u Wailadmiki Shylla, Montri ka chnat Sports & Youth Affairs kam u kongsan katwa u Damechwa Dhar, President NPYF 1-Nartiang Constituency da man u kam u symbood kongsan.
Ya ki kyntien sñiawngooh da yoh na ka Rilin Mary Shadap, General Secretary ryngkat i duwai kyrkhu kyrdoh na u Most Rev. Ferdinand Dkhar. Bishop Jowai Diocese.
Discussion about this post