Kiwa sikai ka Samagra Shiksha Abhiyan (SSA) ha ka jylla da mih ki dei khmat wa kmen wa soohr’khai hadien wa u Chief Minister ka jylla, u Conrad Sangma da pyntikna u wa ka sorkar u yada ko ya i hok kiwa sikai deiwa kular leh wow pynbait noh yei rukom su tulop.
Hawa klam hadien wa kut ka yalang wa da khut da u Montri Rangbah hei emlang u Montri ka chnat Puræ Puthi, u Lahkmen Rymbui wa ki sahep sorkar; neiliang u President ka Meghalaya SSA School Association (MSSASA), u Aristotle Rymbai da ong u wa ka yalang da man ko kawa jop.
U Aristotle da ong u wa u Conrad da klam u deiwa che wa ka sorkar daw yada ko yei hok kiwa sikai SSA ha Meghalaya, khamtam wa i kyrchaan poisa yong ka Scheme SSA na ka sorkar pyrdi daw kut noh ko ha ka 31 tarik u March 2026.
Heiyatoh won wa i dawa ka MSSASA wow pynku ya ka tulop kiwa sikai, u Aristotle Rymbai da pyntip u wa neiliang u Conrad da kular u wow wanrah noh yei pynbait yei rukom su tulop næ ka Pay Structure cha kiwa sikai SSA wa ki Fourth Teachers.
Discussion about this post