U heh ka Meghalaya Trinamool Congress (AITC), u Zenith M. Sangma ynne da ieh noh ko yei man kam u Vice President kamjooh u dkhot ka Party heiwa ya ka chithi mih seiñ da phah cha u President ka All India Trinamool Congress Meghalaya, u Charles Pyngrope.
U Zenith ha ka chithi da ong u wa da mih noh u chisiendon na ka Party deiwa e khublei leh ya chiboon iwa da yoh u na ka Party hei emlang wa ka kamjooh ya waroh i kyrchaan wa da e cha oo tangwa da ong u wa kattæ dapoi u hei bynta wa thymme wei hap u wow jied noh da kawi ka luti kawa yahaap wa iwa thrang u.
U Zenith man u leh u diah u Dr. Mukul Sangma, wei katkam ka khubor wa da yoh, da lai psiah biang u cha ka Congress kawa da pdiang ya oo kam chibynta wow pynkhreh ya ka Election MLA 2028 kamjooh ka Election MDC ka GHADC ha u snem wow wan.
Kam wow pynkynmoo wa u Zenith hadien wa mih u na ka Congress heipor wa dang man MLA chirup wa kiwi, da rem Election MLA won u wei hadien da pynyieñ ya oo kam u kyrtong MP ka AITC na Tura ha u snem 2024.
Discussion about this post