Ka Meghalaya Commercial Truck Owners and Drivers Association (MCTODA) da pteiñ ko yei yakhih wa jai-jai ynne ka sngi ha Mawryngkneng hadien wa kyrriah na Jowai Bypass ha ka 4 tarik uni u bnai.
I pynman yei yakhih hanla man iwa jai-jai tangwa ki pulit da chah pynbaad ki wa i wan yong ki cha Mawryngkneng toh wow pynkulmar donhi wei dei thmu wow tynyap bru donhi.
Katkam i ong ki paidbah ka chnong Mawryngkneng da ong wa nadooh wa sdang i yakhih ha chnong da man iwa jai-jai tangwa ha i step synyaaw ka 5 tarik ki pulit na Shillong da wan ki wow sympat lathi wei wow dat Bomb Tear Gas iwa da pyntieñ ya ki kynthai wa ki khynnah.
Da pynbaad leh wa ki pulit hawa wan ki hei miet ka 5 tarik da phah ki wow khang dukan wei hawa kamtæ yi wow psa ya ki khon ki kti yong ki lada hap khang dukan ki.
Uwi na ki manpa hapyrdi ki paidbah ka Mawryngkneng da ong u wa heipor wa dang pynyieñ kari u ha Mawryngkneng da chah dat u syndet ha ki pulit kiwa da pynmynsoo noh oo na ngab.
Kawi ka manbei da ong ko wa hawa emkaam ya ki pulit wow kem ya ki bru næ wow beh ya kiwa pynawri ha chnong ha thaw hawa Phone cha ki sahep pulit ka Mawryngkneng Police Station ym jooh yoh Phone ya ki tangwa manda ha kini kiwa yakhih wa jai-jai da wan syndet ki pulit wow pynawri wei yoosar em iyi iyi cha lyndet yong ini.
Ynne i step hawa ong ya ki pulit ham noh Bomb Tear Gas hajan ki yung wa ki thaw paidbah, ki pulit da tympdung chynnam ki da u Bomb kamwa choon ya ki kynthai wa ki khynnah kamjooh ya ki paidbah wa chong chnong ka Mawryngkneng.
Discussion about this post