Ka yung krehkaam u Deputy Commissioner, East Jaiñtia Hills District da pynche ko yei yakhih wa da pynman da ka Meghalaya Commercial Truck Owners and Drivers Association (MCTODA) pyrchah ya ki karkhana pynmih khyndaw-bilat wa em hapoh ka District.
Ki bor District da ong ki wa hadien wa da pynbna ya ka yakhih da ka MCTODA ha ka 27 tarik u October 2025, da khut yalang yow yaklam hapyrdi waroh ki liang yow pynbait ya ini i kaam ha ka 30 tarik u October 2025 ha yung krehkaam u Deputy Commissioner ha Khliehriat heiwa da wan wow chimbynta da kiwa mihkhmat ka Jaintia Hills Cement Manufacturers Association (JHCMA), ka Jaintia Hills Truck Owners Association (JHTOA) wa ka East Jaintia Hills Truck Owners and Transporters Association (EJHTOTA). Wei hanla dadep khut ya ka MCTODA tangwa ym em wan ki katwa ka JHTOA wa EJHTOTA da pyntikna ki wa ki krehlang ki wa ki Cement Plant wei ym em kyrchaan ki yeini i yakhih. Wei da e ki leh dei thoh wa kyrchaan ki yei rukom pynbait yow kit ya ki mar.
Hadien ini da khut pynman yalang biang ha ka 31 tarik u October wa ha 3 tarik u November 2025 hapyrdi ka JHCMA wa MCTODA hei pynlai u DC yow yaklam ya ki mat dawa ka MCTODA. Wei ki dawa toh wow pynkrehkaam ya ki dor bai kit, u khang yei kit palat-pood, u e laad chwa ya ki tre chnong wow kit mar, u pynbiang ya ki thaw pynyieñ kari, u su ya ka bai kit heipor wa biang wa i rukom pynbait yei bai mylla.
Hawa yaklam heiyatoh wa kini ki phang, neiliang ka JHCMA da pynche ko wa ka sorkar Meghalaya dadep ko wow pynkrehkaam ya ka bai kit hapoh ka jylla Meghalaya iwa da su leh da waroh ki Cement Plant wa em hapoh ka District.
Tangwa ka MCTODA da kwah ko wow su da ini i jooh i dor manda lai ki cha baar ka jylla. Hajrong ini, u DC da ong u wa ym em kyndon hapoh ka aiñ Motor Vehicles Act, 1988 wa ong wa ka sorkar jylla ye ko wow booh yei dor manda lai cha kiwi ki jylla wei i dor wa da booh hapoh ka jylla man ko katkam ka yaaw ka haat wei deiwa ya mynjur da kiwa phah kit wa kiwa kit mar. Kamtæ wow dawa na ka jylla wow booh i dor bai kit cha baar ka jylla man ko palat yei bor aiñ wa ye ka sorkar jylla u leh.
U DC da ong u wa hawa boon ki dawa ka MCTODA da ye u pynhun ki tangwa da pteiñ ko wow pynthut yei lai i wan ki Truck wa kit Cement wa Clinker ha u National Highway-6, iwa da pynthut leh yei kit ya ki mar wa emkaam kamjooh i lai i wan ki paidbah. Wei da yoh khubor leh wa chah leh pynsih ki kari wa i chah pyndik kiwa yah kari ki wym em chibynta ha ka yakhih. Da ong leh wa neiliang ki pulit ka East Khasi Hills da leh ki katkam ka aiñ yow pynlait yeini i chah khang i lai luti wei yow pynlait biang yei lai ki kari kamjooh i chngaaiñ kiwa lai luti.
Ki bor District da ong ki wa ki toh kiwa chimkhia yeini wei kwah ki wow pynbait ya ini i kaam deiwa em i yaklam deiwa pynrap wa kawon kawon ka seiñ em ko yei hok wow pynsñiaw yeiwa sñiawkhia ki tangwa ym chah won ya kiwon kiwon wow chim ki ya ka aiñ ha kti deiwa khang ya ki sarok paidbah hadooh wa ktah yei lai i wan ki kari wa kit ya ki mar wa emkaam man-ka-sngi.
Kamtæ da ong wa ki bor District daw pteiñ ki wow yaklam wa ka MCTODA, JHTOA, EJHTOTA wa JHCMA yow poi cha i rai wow myntoilang deiwa pynskem leh ya ka aiñ, i lai suk ki kari wei wow yada yei kamai kajih kiwa kamai kari ha waroh kawi ka District.
Discussion about this post