Ka District Level Chief Minister Youth Engagement Programme wa pynman da ka yung krehkaam u Deputy Commissioner ka West Jaiñtia Hills District wa ka yung krehkaam u District Sports Officer ka West Jaintia Hills ha ki ar sngi lynter ha District Library Auditorium, Mynthong, Jowai da poi ko chawa kut ha ka 6 tarik uni u bnai.
Ka thong yong kani ka Youth Engagement Programme toh yow e mynsien wei wow pynchlur ya ki khynroo khyllood wa puræ puthi u mih ki chakhmat wow pynyoo yei sap i phong ha ki jait yakob waphær waphær.
Wei ki jait yakop ha kani ka Youth Engagement Programme kynthup ki ya ka Folk Dance, Folk Song, One Act Play, Quiz Competition, Tug of War, Painting Competition, Story Writing, Poetry Writing, Declamation Competition, Talent Show, i tem Guitar wa Science and Innovation.
Ha kani ka sngi pynkut da wan wow sakhi da u Symbood Montri Rangbah ka sorkar jylla, u Sniawbhalang Dhar, chirup i emlang u DC ka West Jaiñtia Hills, u Abhinav Kumar Singh, u DSO ka District, u Khroobok Passah wa kiwi.
U Sniawbhahlang hawa klam da yaroh u yei sap i phong wa pynyoo ki khynroo khyllood na waroh 4 tylli ki Block wa haap hapoh ka West Jaiñtia Hills District, wei ong u leh neiliang ka sorkar jylla da yaleh ko u thooh laad hajrong kammon u pynwandur ya ki khynroo khyllood wa lai puræ.
Wei lyngba kam kani ka Programme ye leh u yoo ya ki riti dustur ka wow e mynsien ya ki pateiñ.
Da kyntu haroh u ya ki khon khynroo khyllood u chim kabu ki ya kiwon kiwon ki laad ki luit yow pynpliah ya idæ lyngba i bakla, u yakhun kreh chitom wei wow chaniah ya idæ.
Ha kani ka sngi pynkut da saam khusnam cha kiwa jop, heiwa ha ka Folk Dance da yoh nyngkong ka Sohkha Government Secondary School wei da wan wa ar ka Nongtalang Government Secondary kiwa waroh napoh ka Amlarem C&RD Block.
Ha ka Folk Song da jop ka Kiang Nangbah Government College, Jowai wei hei wa ar da yoh ka Kiang Nangbah Higher Secondary School kiwa waroh ar napoh ka Thadlaskeiñ Block.
Ha ka Quiz Competition da yoh nyngkong u Diplanmi Talang wa u Plielad Shaphrang Syngkon kiwa na ka Kiang Nangbah Government College, Jowai katwa hei wa ar da yoh u Nibiang Lyngdoh wa ka Riwanka Pde kiwa na Government Boys’ Higher Secondary School kiwi waroh napoh ka Thadlaskeiñ Block .
Ha ka Tug of War yong ki chynrang, ka St. Joseph Secondary School na Namdong Block da yoh nyngkong ko katwa hei wa ar won ka Sawlyngdoh Higher Secondary School kiwa na Laskieñ Block.
Ha ka Tug of War yong ki kynthai won ka Government Girls’ Higher Secondary School, Jowai da yoh nyngkong ko katwa ka Kiang Nangbah Government Higher Secondary, Jowai da yoh wa ar kiwa haap hapoh ka Thadlaskeiñ Block.
Ha ka Declamation Contest da yoh nyngkong ka Wymhasa Gympad na ka Government Boys’ Higher Secondary School, Jowai katwa hei wa ar da yoh ka Twinklexilingshi Lyngdoh na ka Kiang Nangbah Government College, Jowai kiwa waroh ar napoh ka Thadlaskeiñ Block.
Kawa jop ha ka Painting toh ka Dahunbiam Pohsngap na ka Government Boys’ Higher Secondary School, wa haap hapoh ka Thadlaskeiñ Block katwa ka Antra Khong Thokrem na Nongtalang College na Amlarem Block da yoh wa ar ko.
Ha ka Story Writing, kawa jop toh ka Safica Tariang na ka Krist Syiem Secondary School Namdong Block, wa ar ka Dahunmon Mukhim na Government Boys’ Higher Secondary School. Jowai wa haap hapoh ka Thadlaskeiñ Block.
Ya ka Poetry Competition da yoh nyngkong ka Philawanhun Lamare na ka Winter Adventist Higher Secondary School wa haap ha Laskieñ Block, hei wa ar won ka Samlangki Pohthmi na ka Padu Higher Secondary School wa haap ha ka Amlarem Block.
Ha i tem Guitar da jop u Homeiahdaka Langkiar na ka Cadenza School of Music hei wa ar da yoh u Mangkara Sungoh.
Ha ka Science and Innovation Competition da yoh nyngkong u Ebankitlang Dkhar wa u Sixstar Thubru na ka Little Flower Higher Secondary School Ummulong, da wan wa ar ka Kongka Passah wa ka Durka Passah kiwa na ka Seiñraij Higher Secondary School, Jowai kiwa pynar napoh ka Thadlaskeiñ Block.
Ha ka One Act Play da jop ka Government Boys’ Higher Secondary napoh Thadlaskeiñ Block wei hei wa ar ka Laishnong Higher Secondary School, Amlarem napoh ka Amlarem Block.
Katwa ha ka Talent Show Competition da jop ka Government Boys’ Higher Secondary School, Jowai.
Discussion about this post