Ynne ka sngi da sdang pynman ya ka lehkmen dap 50 snem namo ka Golden Jubilee ka Amlarem Civil Sub-Division heiwa u Chief Minister ka jylla, u Conrad Sangma da man u kam u kongsan.
Ha kani ka sngi da pynman leh ya ka CM Connect ha Amlarem hei emlang u Montri ka sorkar jylla uwa man leh u MLA ka Amlarem, u Lahkmen Rymbui; u Montri ka GAD wa C&RD, u Sosthenes Sohtun; ki MDC wa kiwi ki heh sorkar, ki Dolloi, ki Waheh Chnong wa kiwi kiwi.
Kani ka lehkmen dap 50 snem kawa da sdang nadooh ynne ka sngi u kut ko ha ka 12 tarik u Khonchonglad (Nov) 2026 heiwa ka phang pyrdi ka lehkmen man ko “Amlarem at 50 – The Legacy of Leadership, The Promise of Tomorrow”.
Ha kani ka sngi da yoh ya ki kyntien pdiang burom na u DC ka West Jaiñtia Hills, u Abhinav Kumar Singh wa ki kyntien lamphrang na ka SDO ka Amlarem, ka Ananya Rajshree.
Kani ka Sub-Division da sdang wei da tip ya ka kam ka Jaiñtia Border Sub-Division ha u 1976 heiwa ha u 1979 da pynkylla ya ka kam ka Amlarem Civil Sub-Division hei yahluti kiwa mihkhmat ka thaaiñ ha ki snem wa da lai chakhmat wow wanrah yei chakri wa yajan wa ki paidbah.
Ha ini i lehkmen daw pynman ya ki yakob ya ki khynnah skur wa College, ki thung dieñ, i chondur, ki yalehke Sport, ki Health Camp wa kiwi kiwi.
U Sosthenes Sohtun hawa e i klam da ong u wa i lehkmen toh wow kyruiñdien cha ki 50 snem wa da lai khamtam ya kiwa yahkhmat nachwa kiwa wanrah ya ka khnang wow pyndap pynbiang yei emkaam ki paidbah hapoh ka thaaiñ.
Da ong u wa i krehlang ki paidbah ka thaaiñ chirup wa u Chief Minister wa u Montri uwa man leh u MLA ka thaaiñ daw man ko i myntoi ki liang wanang.
Chooh chooh da ong u wa ynne man ko ka sngi wa kyrpang neibhah lyngba ka CM Connect daw ye ki paidbah wow yaklam wa u Chief Minister hei wow kdaw ki paidbah yeiwa duna wei iyi wow leh wei kammon u pynku ya kani ka thaaiñ.
Neiliang u Lahkmen Rymbui da kynmoo u ya u snem 1976 heipor wa lai Class-2 u heiwa da wan ki sahep kiwa da pyntip wa ha ka 12 tarik u Khonchonglad (Nov) 1976 daw wan wai ya ka Jaiñtia Border Sub-Division ha Amlarem heiwa u Chief Minister u Capt. Williamson Sangma da wan wai u ya kani ka Sub-Division.
Ym em poipyrkhat u leh wa ka Amlarem daw dap ko 50 snem deiwa e khublei ya ki sorkar wa ki Chief Minister wa da lai hadooh u Montri Rangbah ka jylla wa katni wa da pynneh ya kani ka Sub-Division.
Da kdaw u wa la 50 snem wa da lai ka Amlarem dang neh ko kam ka Sub-Division heiwa ka Sohra kawa dang 45 snem daw yoh ko da ka District heiwa da pynsñiaw u nachwa wa katni kammon yaphær wei ku ki thaw puræ wa ki skur hapoh ka Sub-Division deiwa e khublei ya waroh ki MLA ka thaaiñ wa da embynta ki wow wanrah ya ki kaam pynroi ha ka Sub-Division.
Chooh chooh da ong u wa da boon yoh myntoi ka Amlarem tangwa ka thaaiñ da e ko leh chiboon ya ka jylla nadooh ka bordiñ, ka Landport wa kiwi kiwi.
U Lahkmen da kdaw u wa nadooh u 1985 da sdang u soh khontara wow dooh na ka thaaiñ heiwa ka chnat Agriculture, ICAR wa Horticulture da thooh ki ya ki daw wa yap ki dieñ uni u soh tangwa khlem chem ya ki daw. Da khana u leh wa kiwi ki mar rep da ku bha ki ha ka thaaiñ najrong ki sarok wa kiwi.
Da khana u wa hadien ka Garo, ka Amlarem toh kawa ar wow yoh ya ka Civil Sub-Division Hospital kawa 50 pyllong ha Jaraiñ, deiwa e khublei ya u Chief Minister wa da e chiboon ya ka thaaiñ.
Chooh chooh da kylli u wa lada em ki Chief Minister wa yut na ki paidbah tangwa uwa katni toh u bru uwa ap wow pyrkhat ya ki rukom krehkaam neibynta ki paidbah ka thaaiñ wa ka jylla.
U Lahkmen da pynbna u leh wa na ka chnat Tourism da e ko Rs. 85 klur neibynta wow pynmiat pynbha ya ki thaw uiñke hapoh ka thaaiñ hanla em chiboon i duna ha ka thaaiñ deiwa kyntu ya u Conrad wow pynkylla ya ka Amlarem Civil Sub-Division liang wanang.
Neiliang u Chief Minister da e u leh ya ka Sanction Order cha ka Nang Hai Ryum College, Amlarem.
U Conrad Sangma kam u kongsan ha kani ka sngi da e khublei u ya u Blai wa da kyrkhu u ya waroh wow em kani ka Sub-Division deiwa kyrpaad ya waroh wow kyruiñdien cha ki 50 snem wa da lai wa em kani ka Sub-Division deiwa kynmoo ya kiwa mihkhmat nachwa nadooh u J.D. Pohrmen, u Enowell Pohshna wa kiwi kiwi.
Da kular u leh wow kreh chitom neibynta ki paidbah ka thaaiñ heiwa daw yaleh u pynyajan ya i synchaar wa ki paidbah deiwa kdaw wa ha ki 7 snem tam da yaleh wow pynyaar ya i chakri deiwa sdang ya ki Civil Sub-Division wa ki Block wei hajrong itæ waroh ki 46 tylli ki Block da yoh ki ya ki yung krehkaam wa thymme wei da sdang thymme ya 10 tylli kiwa thymme ki Block Office.
Da kynmoo u wa ha ka samoi warim ka chnat Education ong ko wa emkaam Rs. 2,000 klur wow pynthymme ya i rukom puræ hapoh ka jylla wei hawa chong pyrkhat u wa u Montri ka chnat Education, u Lahkmen Rymbui da sdang chwa da ki kaam wa khian heiwa katni 80% ki skur sorkar da yoh ki ya ki yung wa thymme wei ym du ha ki skur sorkar tangwa wot ya ki Police Station heiwa da sdang ya ka Police Renovation Reform wow e bor ya ki SP wow pyrkhat yei yi wei heiwon u pynemkaam u kreh nadooh iwa khian.
U Conrad da pynbna u leh Rs. 20 lak cha kani ka lehkmen wa chi snem na ka CM’s Special Grant.
Ha kani ka sngi da yoh leh i klam na u President ka Synjuk ki Waheh Chnong, u Dwinson Rymbui heiwa da e leh ya ka dorkhat ha u Chief Minister heiwa da dawa wow chna ya ka Mini Secretariat ha Amlarem, wow pynbiang ya ka um dih ha Amlarem Sub-Disivion, wow siang psiang ya u sarok na Amlarem cha Khonglah, wow chna pynmiat ya ka PHC, ka Muktapur Health Centre wa ka Padu Health Centre, wow pynku kyrdan ya ka yung krehkaam u Asst. Engineer ka PWD cha ka Division, wow chimkti ya ka Amlarem Secondary School da ka sorkar, wow kyrriah ya ka Veterinary cha ka chnong Mupyut wei wow kær naar chieh ya ka Amlarem Police Station wei wow pynyaar ya u pood yong ka.
Ya kani ka sngi da pynphooh da ki rwai wa ki chaad na ki khynnah ka thaaiñ ha kiwa boon rukom.
Discussion about this post