Ha iwi i jia wa pynkhyrngiat ya kiwa boon wa lang, kawi ka manbei da ujor ko wa da chah dai i khon ko iwa dang dep kha wot khlem tip ko, wei ini da jia i ha Silchar, Assam heiwa ki pulit da kem ki ya uwi u bru wa emkti wow leh yeini i kaam.
Uni uwa chah kem da tip kam u Amir Hussain uwa chong chnong ka Madhurbond wa em ha Silchar wei ki pulit da chem ki wa uni man u kam u dalal wow dai yeini i khonboo hei dor wa Rs. 40,000.
Kani ka manbei kawa tip kam ka Samirunnesa da kha khon ko ha Silchar Medical College wei hadien ini da liwan ko cha i yung wai wa sah ko ha Madhurbond deilang wa u kurim ko uwa tip kam u Gulzar Hussain Talukdar wei da man ko leh ka kurim wa ar u Gulzar heiwa ka kurim wa nyngkong u toh ka Roshna Begum.
U Gulzar wa ka Roshna deiwa yarap u Amir da dai ki ya ini i khon chynrang ka Samirunnesa iwa da kha ha ka 25 tarik u November wei da mih Hospital ko ha ka 3 tarik. Kamtæ ha ka 7 tarik u Gulzar wa ka Roshna deilang wa u Amir da wan ki cha ini i yung heiwa ym tipmit ko ya u Amir tangwa da ong ki ya ka wow liwan ki deilang wa ka cha chnong ko wa em ha Ratabari wei da chim ki da kawi ka Bus.
Manda pynchong ki ka hapoh ka Bus, kini ki le ngut da mih ki deiwa rahlang wa i khonboo wei ym em de wan ki wei manda thooh ko ki leh ym em de chem ko ki wei ha ini i por da suba wa da em wa leh ki iyi ræ iyi.
Kamtæ da lai booh FIR ko wei manda takit ki pulit da chem ya ini i khonboo wa em i wa ki chi kurim ki wym em khon ha chnong Durganagar, Udharbond ka Cachar Distrct heiwa kini ki chi kurim da ong ki wym tip ki yeini wa chah rahbor i khonboo tangwa da pyntip cha ka wa ka bei ini i khonboo toh ka Roshan kawa da e ki dei mon sñiawbha ko.
Ki pulit da yoh ki wow kem ya u Amir donhi katwa u Gulzar wa ka Roshan dang yut ki.
Neiliang ki pulit da ye ki wow e kti biang ya i khonboo cha ka bei tre wei da chem leh wa da dai yeini i khonboo hei dor wa Rs. 40,000.
Discussion about this post