Ka NPP 4-Mowkaiaw Block da pdiang burom ko ya u Wailadmiki Shylla yeiwa da yoh u wow man kam u Montri sorkar deiwa pait ya chnat Sports & Youth Affairs, ka chnat Health & Family Welfare wa Home (Passport) wei yeini i pdiang burom da leh heipor wa wan u cha Mowkaiaw Constituency neibynta wow pynhaap pyrda ya ar tylli ki yalehbol Final ha chnong Saphai wa Mowtyrchiah-A ha ka 15 tarik uni u bnai.
Ka NPP 4-Mowkaiaw Block dap ko dei mynsien wa kmen yei chaniah u CM, u Conrad Sangma ya u Wailadmiki Shylla kam u khon khynroo ka Jaiñtia wow man kam u Montri ka jylla, kamtæ ka Party da kitbok ko ya u Wailad wow nang yoh u yei bor na u Blai wow chakri wei wanrah yei kyrkhu ha ki por wow nang wan ha Jaiñtia Hills wa ka jylla waroh kawi.
Ha kani ka pdiang burom da yoh leh wow pynsñiaw ha u Wailad kam u Montri sorkar ya chiboon i duna hapoh ka Constituency nadooh ki kaam Sport heiwa hapoh ka Laskein Block ym pu em kawi wot leh ka madan Artificial Turf wa i duna yong ki Doctor ha ki CHC wa PHC waphær waphær wa em hapoh ka Constituency.
Ha kani ka sngi da ya emlang nadooh u Heirtami Suting, President ka Party, u Chanki Lyngdoh Secretary (MDC warim ka 13-Saphai ), u MDC ka 14-Mowkaiaw, u Wormanship Shadap, u Nehemayah Tyngkan, State Working President NPP, u Mon Biam, Vice President, u Pyndap Shadap Youth President, u Ardakirang Rymbai, Youth Secretary, u Remdor Lyngdoh, u Arnol Dhar, u Daurang Suchiang, u Dapmain Laloo, ka Rima Suchiang, President Women’s Wing, ka Balari Lapasam Secretary Women’s Wing wa ka Pdiangjingshaihun Dkhar.
Discussion about this post