Poi ICU ki ar ngut ki kynthai wa chah tyrrah kari wa yah da uwa muaid ha NEHU

Ar ngut ki kynthai wa lai puræ ha North-Eastern Hill University (NEHU) da mynsoo joor ki hadien wa kawi ka kari Maruti 800 wa pynhær bha da tyrrah ko ki katwa dang lai ki hajan ka Gate-II ynnin i miet ka 17 tarik heipor 7:36 heiwa da em leh kawi ka Scooty wa em uwi uwa yah wa chah tyrrah lang.

Yeini wa jia da yoh leh wow riñ da ka CCTV

Kani ka kari toh kawa em Number ML-05J-4916 wei kawa yah da u Parmen M. Sangma uwa man kam u Security Guard, wei man u uwa da muaid wei kiwa chah tyrrah toh ka Stephanie Shadap (22 snem) wa ka Daritngen Ponduhkhei (20 snem).

Kini ki ar ngut wa chah tyrrah da sied wei chah rah ki ha kani ka kari kawa da tyrrah leh ya ka Gate kani ka skurbah. Nyngkong da kit ya kini ki ar ngut cha Shillong Civil Hospital tangwa neidaw wa joor mynsoo ki da kit won cha Nazareth Hospital wei da em ki hapoh ka ICU.

Kawi na kini ki kynthai da haap ko ha tre Gate katwa kawi won dapoi ko cha u sarok wa em ha lait ka Gate.

Ki pulit da pyntikna ki wa uni u bru toh uwa yah kari hadien wa dep dih kiad wei da phah leh wow leh u ya ka Medical Examination yow pynsakhiat yeini.

Ya ka kari da rah da ki pulit ka Mawkynroh Outpost wei ka takit dang lai ko chakhmat.

Ha katai ka miet wa jia toh heipor wa pynman ya ka Fresher’s Meet heiwa da em leh ka lehkmen.

Related posts

Yap ki 18 ngut na ki 3 pateiñ kawi ka manyung hei iñ ka Bus kiwa na Hyderabad ha Medina

November 18, 2025

Ha ka sien wa nyngkong daw wanrah ya ka FIFA World Cup Trophy ha Northeast India

November 18, 2025