Ynne ka sngi da pynman ya ka Dorbar Tlang ka JHADC kawa chi sngi heiwa ki MDC ka Liang Pyrchah da yieñ wow pyrchah yei pynman ya ka dorbar du chi sngi heiwa ym yoh laad de ki wow kylli ya waroh iwa kwah ki na ka Council katkam wa da booh ha ka kynta wow kylli wei wow e jubab namo ka Question and Answer Hour.
U MDC ka VPP, u Nehemaia Lamare da ong u wa ha ka Dorbar Ly’ur ka Council wa dadep pynman ha u Naiynñiaw 2025, ki MDC ka Liang Pyrchah khamtam ki yong ka VPP ym yoh ki u kylli iwi wot leh iwa kwah ki neibhah wa da pynman tbian ware ya ka.
Da ong u wa ini da ktah bha ya ki kam kiwa mihkhmat wa da jied ki paidbah cha ka Council neibhah wa iwa kwah ki u tip toh iwa ktah ya ka Council wa ya ki paidbah.
U Jamshaphrang Pohtam leh da ban u yei jooh deiwa ong wa i rukom man dorbar man lakam wa da kheiñ kyndeh donhi ya ki iwa lakam wan chong donhi ki ha ka Council khlem iwon iwon i kreh.
Kam ka dak wow pyrchah yei rukom pynlai ya ka dorbar hapoh ka Council, u Jamshaphrang ynne da kyntait u wow chitmbynta ha ka kynta kylli-jubab na ka Executive Committee kam ka dak wa pyrchah yeini i rukom pynlai ya ka dorbar.
Heiyatoh wa ini i jooh, u MDC ka Congress, u Rikut Parien leh da phylla u wa boonsien iwa kylli ki MDC man iwa chah kyntait namo iwa ym pdiang deiwa thoh ‘Vague’ namo ym che.
Da ong u leh wa iwa kylli ki MDC toh ki kaam wa yatoh wa ka Council wa ka jaitbru weileh won wa kyntait namo ym pdiang ya ki mat wa da kylli.
Hajrong kini kiyi kiyi, neiliang u Chairman ka Council, u Dr. Sankey Shangpung da pynche u wa i kaamram yong oo toh wow bood ya ki kyndon pynkrehkaam ya ka dorbar wei ymtoh i kaamram yong oo wow pynche yeini waroh.
Hadien ini ka Question and Reply da man ko kawa lai bait wei da kynmoo warom leh ya u MDC (Nominated) warim uwa da khlaad, u Thomas Nongtdu.
Discussion about this post