U Symbood Montri Rangbah uwa pait ya ka chnat Pynroi Sor (Urban), u Sniawbhalang Dhar da pynche u wa ka sorkar lyngba ka chnat Shillong Municipal Board (SMB) ym em pynthut ki yei lai tyrwa dai ya ki mar ha luti Khyndailad, tangwa i khang toh wa em kiwa da sdang chong hadien wa da yoh yei ujor na kiwa chongdai ha yaaw dai madan.
Ki bor ka Municipal Board ynnin ka sngi da lai ki wow khang yei tyrwa cha wa kiwa dai soh ha ka luti kjat ha Khyndailad, heiwa da ki phaw ngut kiwa tyrwa cha wa ki soh da chah ksoh ki wei da pynsñiaw ki yei chrai.
Hawa klam hajrong ini ynne ka sngi, u Sniawbhalang da ong u wa ka sorkar ym pynthut ko ya kiwa dai deiwa uiñ deiwa lai, tangwa da pyntip u wa i lai ki bor ka Municipal cha katai ka thaaiñ toh hadien wa da yoh ujor na kiwa chong ha yaaw chongdai madan wa em kiwa da sdang wow chong harooh sarok.
Da pyntip u leh wa ynne hi ka sngi da khut yow paan pynche na ki sahep ka SMB, wei da ong u wym em iyi iyi leh embor, tangwa hadien wa da yoh yei ujor wa da em kiwa da sdang yalumlang 8-9 ngut, ki bor wa pait yeini da kyrpaad ki ya ki wym toh u chong ha katai ka thaw.
Ha kawi won ka liang, u Symbood Montri Rangbah da ong u wa kam kiwa yahkhmat paidbah ymtoh u leh Politics ki ya ki kaam wym toh u leh, neibhah wa iwa jia ynnin ka sngi da khut leh ya ka yalang ynne ka sngi wei da pynrap u wym em mut wa katwa em ki kaam toh u leh Politics.
Hadien wa da mih ini i kynrum kynram, ynne ka sngi, neiliang u Ardent Basaïawmoit deilang ki dkhot ka VPP da lai ki wow yaklam wa ki bru kiwa tyrwa cha tyrwa soh ha Khyndailad.
Discussion about this post