U Deputy Commissioner ka East Jaiñtia Hills District ynne ka sngi da pynmih u ya ka hukum wow thung da ka Joint Enquiry Committee hadien wa mih ka khubor wa chitom ki khynnah ka Jawahar Navodaya Vidyalaya (JNV), Rymbai ha ka 22 tarik uni u bnai neiwa baam yei baam wa chet ha kani ka skur.
Neiliang u DC da ong u wa deiwa chimkhia yeini i kaam da phah wow takit yeiwa jia heiwa ya kani ka Committee daw pait da u Sub-Divisional Officer (SDO)- Sadar, East Jaiñtia Hills District, u Manish Kumar; katwa ki dkhot u kynthup ki ya u Food Safety Officer (FSO), u District Medical & Health Officer (DM&HO), u Sub-Divisional School Education Officer (SDSEO) wa u District Child Protection Officer (DCPO).
Da phah leh ya ka Committee wow takit bniah ko hajrong ini iwa jia wei wow e ya ka bui (Report) wa bñiah cha u Deputy Commissioner, East Jaiñtia Hills District hapoh chi tayaaw.
Kam wow kdaw heini, ha ka 26 tarik uni u bnai u Principal ka Jawahar Navodaya Vidyalaya (JNV), Rymbai, u Dr. Raj Kumar da e u ya ka bui cha u Deputy Commissioner Cum Chairman, Vidyalaya Management Committee (VMC), East Jaiñtia Hills District, wow khana che yeiwa jia.
Ha kani ka bui, u Principal da pyntip u wa neidaw wa phær syndet i suiñ bneiñ ha ka 22 tarik uni u bnai da em 17 ngut ki kynthai wa da iñdoh, ky’oh wei da paar-kjam ki wei da phah liwan ki wow chah sumaar ki ha yung wei wow yada ya kiwi tawon ki khynnah.
U Principal da pyntip u leh wa ha ka 23 tarik won da em ki khynnah wa ood sooh-kpoh.
Ha kani ka skur em du kawi donhi ka Nurse wei duna ki laad sumaar ha ka khamtam wa em boon ki khynnah wa sah ha kawi ka kamra-bah (Hall) ha i thaw wa chipor ka skur.
Neiliang u Principal da pyntip u leh wa em kamwa 38 ngut ki khynnah (boon ki kynthai) kiwa da kjut nadooh ka 25 tarik wei na ki 11 ngut da wan biang ki cha skur.
Chooh chooh da pyntip wa ym em ki khynnah wa thiah chah sumaar ha Hospital wei kiwa boon ki khynnah leh da khlan hi ki katkam i yaklam hapyrdi ka Nurse ka JNV wa ki khynnah.
Discussion about this post